Healthy Recipe :

सध्या अनेक व्हायरल आजार होत आहेत. हे आजार होऊन गेले की तोंडाची चव कडवट झालेली असते. आजारपणातील औषधांमुळे तोंड कडवट झालेले असते. कितीही खाल्लं तरी तोंडाला चव नसल्याने जेवल्यासारखेच वाटत नाही.

अशावेळी काही पारंपरिक पदार्थ तुमच्या मदतीला धावून येऊ शकतात. आजारपणात पोषण मिळेल अशा पदार्थांचे सेवन करावे. तुम्ही ताटाला लावण्यासाठीचे ज्यादाचे पदार्थ बनवू शकता. जे तुमच्या तोंडाची गेलेली चव परत आणतील. (Healthy Recipe)

यामध्ये डाळीचा चटका, मुळाचा चटका आणि उडदाच्या डाळीचे डांगर यांचा समावेश आहे. अगदी कमी वेळात तुम्ही हे पदार्थ बनवू शकता. जे तुमच्या जेवणाची रंगत वाढवतील.

डाळीचा चटका

साहित्य -

अर्धी वाटी हरभरा डाळ भिजत घालावी. अर्धा टी स्पून जिरे, ५ ते ६ हिरव्या मिरच्या, ४ ते ५ लसूण पाकळ्या, मूठभर चिरलेली कोथिंबीर, अर्धी वाटी दही, १ टे. स्पून तेलाची हिंग, हळद, मोहरी घालून केलेली फोडणी.

कृती :

- भिजवलेली हरभरा डाळ निथळून घ्यावी त्यात हिरवी मिरची, जिरे, लसूण, कोथिंबीर, मीठ, साखर चवीनुसार घालून चटणी वाटावी. फार बारीक वाटू नये. वाटलेल्या चटणीला दही घालून सरबरीत कालवावे. वरून एक टे. स्पून तेलाची फोडणी द्यावी.

वरील चटक्यात एक ताजा मुळा किसून घालून मुळ्याचा चटका करावा. मुळा घातल्यास लसूण घालू नये.

मुळ्याच्या चटका

साहित्य -  

अर्धी वाटी हरभरा डाळ भिजत घालावी, १ पांढरा कोवळा मुळा साल काढून किसून घ्यावा, ३ ते ४ हिरव्या मिरच्या, पाव चमचा जिरे, थोडी कोथिंबीर, १ वाटीभर साय काढलेल्या दुधाचे दही

कृती :

भिजवलेली हरभरा डाळ निथळून घ्यावी त्यात हिरवी मिरची, जिरे, कोथिंबीर, मीठ घालून डाळ वाटून घ्यावी, फार बारीक वाटू नये.

वाटलेल्या डाळीत किसलेला मुळा व दही घालून चटणी कालवावी. (३) आवडत असल्यास १ टी स्पून तेलाची मोहोरी, हळद, हिंगाची फोडणी द्यावी.

उडदाचे डांगर

साहीत्य

१ भांडे उडदाची डाळ, १ भांडे हरभरा डाळ, १ टी स्पून जिरे, १ मोठा कांदा बारीक चिरून, १ टी स्पून लाल तिखट, चवीनुसार मीठ, १ चमचा तेल, मोहरी, हिंग, १ वाटी दही.

कृती

उडदाची डाळ व हरभरा डाळ १ टी स्पून जिरे घालून भरड दळून घ्यावी. वरील दळलेला भरडा अर्धी वाटी घ्यावा. त्यात बारीक चिरलेला कांदा, तिखट, मीठ, दही घालून कालवावे. आवडत असल्यास अर्धा टी स्पून साखर घालावी. वरून तेलाची मोहरी, हिंग घालून फोडणी द्यावी व मग कालवावे.

(संबंधित रेसिपी सौ.जयश्री देशपांडे यांच्या हमखास पाककृती या पुस्तकातून घेण्यात आल्या आहेत)