भाद्रपद षष्ठीला  उंदीरकीची खीर - भाद्रपद षष्ठी सोमवार (ता. २४). ज्येष्ठा गौरीच्या आवाहनाचा अगोदरचा दिवस. शक्तीवर्धक, थकवा आणि पोटाचे विकार कमी करणारी खीर चला आपण करु यात. ! 

 
साहित्य : गहू एक वाटी. गुळ अर्धा वाटी. दूध अर्धा लिटर. वेलची पूड. जायफळ. ओल्या नारळाचा खीस एक वाटी 

कृती : गहू पाण्याचा हात लावून ओलावून घ्यावे. अर्ध्या तासाने मिक्सरमध्ये जाडसर वाटावे व त्याची साले काढून घ्यावी. तो गव्हाचा रवा कुकरमध्ये ठेवून तीन शिट्ट्या करून शिजवून घ्यावा. गार झाल्यावर त्यात दूध घालावे व एक उकळी द्यावी. नंतर त्यात बारीक केलेला गुळ घालावा व नारळाचा चव घालावी व गॅस बंद केला. नंतर वेलची पूड व जायफळ पावडर घालावी. ही खीर गार चांगली लागते . 
 

औषधी गुणधर्म : नारळ, दूध, गुळ, वेलची मुळे उत्तम शक्तिवर्धक. वात नाशक, थकवा कमी करणारे, पावसाळ्यातील पोटाचे विकार कमी करून अग्नी वाढवणारे आहे. गर्भवतींना थकवा घालवण्यासाठी उत्तम.