आज हिंदु कॅलेंडर नुसार संकष्टी चतुर्थी आहे; लाडक्या बाप्पासाठी आज अनेक लोक उपवास करतात; आणि रात्री चंद्रोदय झाला की बाप्पाला मोदकांचा नैवेद्य दाखवून उपवास सोडतात. पण आज एक वेगळी आणि भन्नाट रेसिपी आम्ही तुमच्या बरोबर शेअर करतो आहोत.

आज रात्री ०८.४६ मिनिटांनी चंद्रोदय होणार आहे; म्हणजे आपण या नंतर बाप्पाला नैवेद्य दाखवून आपला उपवास सोडू शकतो. मोदक हा गणपती बाप्पाचा अतिशय आवडता पदार्थ मानला जातो. चला जाणून घेऊया मोदक खीर बनवण्याची सोपी रेसिपी.

मोदक खीर साठी साहित्य

दूध - दीड लिटर

ताजी साय - 1/2 कप

तांदळाचे पीठ - 1 कप

पिठी साखर - 2 टीस्पून

 पिस्ता - 2 टीस्पून

 वेलची पावडर - दिड टीस्पून

 केशर - एक चिमूटभर

 देसी तूप - 1 टीस्पून

 साखर - दिड कप

 मीठ - चिमूटभर

मोदक खीर कशी बनवायची

मोदक खीर बनवण्यासाठी सगळ्यात आधी तांदळाचे पीठ मिक्सिंग बाऊलमध्ये घ्या. त्यात चिमूटभर मीठ आणि गाईचे तूप घाला. आता त्यात पिठी साखर आणि वेलची पावडर घालून मिक्स करा. यानंतर त्यात उकळलेले पाणी घालून पीठ मळून घ्या. हे पीठ थोडा वेळ बाजूला ठेवा.

पीठ जरा थंड झाल्यावर तळहातावर तूप लावून पिठाचे छोटे गोळे तयार करा. एका प्लेटमध्ये बाजूला ठेवा. पूर्ण पिठाचे गोळे तयार करून स्टीमर मध्ये हे गोळे 8-10 मिनिटे वाफवून शिजवा. जर तुमच्याकडे स्टीमर नसेल तर तुम्ही यासाठी कुकर देखील वापरू शकता.

आता एका भांड्यात दूध काढून मध्यम आचेवर गरम करायला ठेवा. दूध गरम असताना सतत ढवळत राहा. दूध उकळून घट्ट झाल्यावर गॅसची आंच कमी करून त्यात अर्धी वाटी साखर, वेलची पूड, साय आणि केशर घालून मिक्स करा. 

यानंतर वाफवलेले गोळे दुधात टाकून झाकण ठेवून शिजू द्या.  5-7 मिनिटांत हे गोळे मऊ होतील आणि खीर मलाईदार होईल.  त्यानंतर गॅस बंद करा. मोदक खीर गणपती बाप्पाला नैवेद्य दाखवण्यासाठी तयार आहे. सर्व्ह करण्यापूर्वी तुम्ही ती पिस्त्याने देखील सजवू शकतात.