Moringa Leaves : शेवग्याचं झाड अतिशय वेगानं वाढतं. त्याच्या शेंगांबरोबरच पानं, फुलंदेखील खाण्यासाठी वापरली जातात. या झाडाचे हे तीनही भाग खूप फायदेशीर आहेत. शेवग्यामध्ये प्रथिनं, अमीनो अॅसिडस्, बीटा-कॅरोटीन आणि वेगवेगळ्या प्रकारचे फिनॉलिक असतात जे उच्च रक्तदाबाच्या रुग्णांसाठी फायदेशीर ठरतात. आजच्या लेखात आपण बहुगुणी शेवग्याच्या पानांची भाजी कशी तयार करतात याची सविस्तर रेसिपी पाहू या...

साहित्य:

शेवग्याची कोवळी पाने

एक वाटी तांदळाचे पीठ

एक कांदा बारीक चिरलेला

आले-लसूण-मिरचीची पेस्ट

लाल मिरच्या

लाल तिखट

हळद

जिरे

मोहरीचे तेल

मीठ चवीनुसार

कृती:

शेवग्याची भाजी बनवण्यासाठी सर्वप्रथम शेवग्याची पाने देठापासून वेगळी करा. नंतर दोन ते तीन पाण्याने धुवा. आता ती बारीक चिरून घ्या. एका मोठ्या भांड्यात या चिरलेल्या पानांमध्ये तांदळाचे पीठ चांगले मिक्स करा. आता कढईत तेल गरम करा. तेल गरम झाल्यावर त्यात जिरे तडतडून घ्या. आले-लसूण आणि मिरचीची पेस्ट टाका आणि नीट परतून घ्या.

पेस्ट भाजल्यावर त्यात कांदा घाला. सोबत अख्खी लाल मिरची घालावी. मंद आचेवर कांदे चांगला परतवून घ्या. नंतर त्या तांदळाच्या पिठात मिक्स केलेले शेवग्याचे पाने टाका आणि मिक्स करा. मीठ टाकून एकदा नीट मिक्स करा. मंद आचेवर भाजी चांगली शिजवा. तुमची चविष्ट क्रिस्पी शेवग्याच्या पानांची भाजी तयार आहे. पोळी किंवा वरण-भातसोबत सर्व्ह करा.