Chandan Batwa Bhaji: चंदनबटवा ही हिरवी पालेभाजी गुणकारी मानली गेली आहे. या भाजीमध्ये अ जीवनसत्व, कॅल्शियम, फॉस्फोरस, आणि पोटॅशियम मुबलक मात्रेमध्ये आहेत. या पालेभाजीमध्ये लोह आणि फायबरही आहे. चंदनबटव्याची पालेभाजी थंडीच्या दिवसांमध्ये सहज उपलब्ध होणारी भाजी आहे. या पालेभाजीच्या सेवनाने किडनी स्टोन होण्याचा धोका टाळता येऊ शकतो. आजच्या लेखात आपण हिवाळ्यात आरोग्याला पौष्टिक असणारी चंदन बटवा भाजी कशी तयार करायची याची सविस्तर रेसिपी पाहणार आहोत.

साहित्य:

1) दोन जुडी चंदन बटव्याची भाजी 

2) एक वाटी घट्ट दही

3) अर्धा चमचा साखर

4) चवीनुसार मीठ

5) एक मोठा चमचा दाण्याचा कूट

6) एक चमचा आलं व मिरचीचे वाटण

7) कोथिंबीर 

8) तेल

9) जीरे 

10) मोहरी 

11) चिमूटभर हिंग 

12) एक चमचा तीळ

13) कढीपत्त्याची पाने

14) चिमूटभर हळद

15) अर्धा चमचा तिखट

कृती:

सर्वप्रथम भाजी निट निसुन घेऊन त्यांची पानं स्वच्छ धुऊन त्याला बारीक कापावं व स्टीमर मध्ये चाळणीमध्ये वरती पंधरा मिनिटे वाफवून घ्यावी.मग वाफवलेल्या भाजीमध्ये दाण्याचा कूट मिरचीचं वाटण, कोथिंबीर,साखर मीठ,हळद,तिखट व दही घालून एकजीव करावे.छोट्या कढल्यामध्ये तेल घालून ते गरम झालं की त्यामध्ये हिंग मोहरी जिरं तीळ व कढीपत्ता घालून खमंग फोडणी करावी व ती वरील भाजीमध्ये घालावी व एकजीव करावे ही भाजी खूप टेस्टी होते ही चपाती बरोबर भाकरी बरोबर आपण खाऊ शकतो.