Gul papadi : गूळ कॅल्शियम, मॅग्नेशियम, लोह, पोटॅशियम आणि फॉस्फरसने भरलेला असतो आणि त्यात जस्त, तांबे, थायामिन, रिबोफ्लेविन आणि नियासिन देखील असतात. अभ्यासानुसार गुळात बी जीवनसत्त्वे, काही प्रमाणात वनस्पती प्रोटीन आणि भरपूर फायटोकेमिकल्स आणि अँटीऑक्सिडंट असतात. विशेषत: हिवाळ्याच्या काळात गूळ खाण्याचे अनेक फायदे असतात. याच गूळापासून आज आपण गूळ पापडी कशी तयार करायची याची सविस्तर रेसिपी आजच्या लेखात पाहणार आहोत.

साहित्य

1) दीड वाटी गव्हाचे पिठ

2) एक वाटी साजूक तूप, 

3) बारीक केलेला पाऊण वाटी गूळ

4) चार चमचे बारीक खोबरं

5) दोन चमचे खसखस

6) बारीक केलेले दोन चमचे बदाम-काजू

7) चिमूटभर मीठ

कृती

सर्व प्रथम कढईत गव्हाचे पिठ घालून भाजून घ्यावे. जरा भाजली की त्यात हळूहळू सगळं तूप टाकत जावे. आता पिठाला सोनेरी रंग येईपर्यंत ते मंद आचेवर भाजत राहा. हे पिठ आणि तुपाचं मिश्रण डोशाच्या पिठासारखं पातळ होतं. छान सुगंध आला की त्यात खोबरं, खसखस, मीठ आणि काजू-बदामाची पूड खालून भाजावे. मग त्यात बारीक केलेला गूळ घालून मिश्रण हलवावे आता गॅस बंद करून मिश्रण थोडं एकजीव करून तूप लावलेल्या ताटामध्ये पसरवा आणि गरम असतानाच त्याच्या वड्या पाडा. मिश्रण थंड झालं की वडी वेगळी करून मस्त खावी.