नाचणी अत्यंत पौष्टिक असून शरीरासाठी अत्यंत उपयोगी आहे. विशेष म्हणजे नाचणी केवळ भाकरीपूरतीचं मर्यादित नसून वेगवेगळ्या पदार्थ करुन तिचा आहारात समावेश करता येऊ शकतो. नाचणीमुळे वजन नियंत्रणात राहते.पोटदुखी, अपचन तक्रारी दूर होतात.अशक्तपणा दूर होतो.कंबर दुखत असल्यास नाचणीची पेज प्यावी.शरीरावर फोड आल्यास ते फोडण्याकरिता नाचणीच्या पीठाचे पोटीस बांधावे. शरीरातील साखरेचे प्रमाण नियंत्रणात राहते.अशा या बहुगुणी नाचणीचे हिवाळ्यात पौष्टिक धपाटे कसे करायचे याची सविस्तर रेसिपी आज आपण या लेखात पाहणार आहोत.

साहित्य :

1) दोन वाटी नाचणीचे पीठ

2) दिड वाटी ज्वारीचे पीठ

3) दोन ते तिन चमचे बेसन पीठ

4) दोन चमचे हिरवी मिरची व लसूण पेस्ट

5) चवीप्रमाणे मीठ

6) तेल

7) एक चमचा तीळ

8) एक चमचा ओवा

9) बारीक चिरलेली कोथिंबीर

10) एक मध्यम आकाराचा कांदा

11) पाणी

कृती:

एका बाऊलमध्ये सर्व पीठे घालून मिक्स करून घेणे. नंतर ओवा,तीळ, मीठ घालून मिक्स करून घेणे.ठेचा,चिरलेली कोथिंबीर व कांदा, तेल घालून मिक्स करावे.थोडे-थोडे पाणी घालून पीठ घट्ट मळून घेणे.

साधारणपणे 15 ते 20 मिनिटे झाकून ठेवावे.गॅसवर तवा तापत ठेवावा. सुती कापड घेऊन त्याला पाणी लावणे. एक छोटा गोळा घेऊन, धपाटे थापून घेणे. त्याला बोटाने होल पाडून घ्यावे.

तवा तापल्यावर गॅस मंद आचेवर ठेवून त्याला तेल लावून घेणे. कापडासहित धपाटे तव्यावर टाकून घेणे. वरून कापड काढून घेणे. झाकण ठेवून दोन मिनिटे शिजू द्यावे.

झाकण काढून घेणे व दुसऱ्या बाजूलाही तेल लावून खरपूस भाजून घेणे. अशाप्रकारे सर्व धपाटे करून घेणे.गरमागरम नाचणीचे पौष्टिक धपाटे दही किंवा कोणत्याही उसळी बरोबर तुम्ही खाऊ शकता.