औरंगाबाद : शहराचे आराध्य दैवत असलेल्या संस्थान गणपतीची बुधवारी (ता.३१) राजकीय नेत्यांच्या उपस्थितीत विधिवत पूजा अर्चा करून श्रींची प्राणप्रतिष्ठा करण्यात आली. सहकारमंत्री अतुल सावे, शिवसेना नेते चंद्रकांत खैरे, विधानपरिषदेचे विरोधी पक्षनेते अंबादास दानवे, पोलिस आयुक्त डॉ. निखिल गुप्ता, जिल्हा गणेश महासंघाचे संस्थापक अध्यक्ष पृथ्वीराज पवार, गणेश उत्सव महासंघाचे अध्यक्ष विजय औताडे, नंदकुमार घोडेले, अनिल मकरिये, जगन्नाथ काळे यांच्या उपस्थितीत श्रींची आरती करण्यात आली.

यंदा संस्थान गणपती उत्सवात श्री संस्थानची मूर्ती फिटकडी-तुरटीचा उपयोग करून पूर्णपणे पर्यावरणपूरक अशी करण्यात आली आहे. ही मूर्ती करताना जायन्ट्स ग्रूप ऑफ औरंगाबाद प्राइडने विशेष सहकार्य केले. यासाठी लागणारे साहित्य साबू, सारा केमिकल यांनी उपलब्ध करून दिले. बगले यांनी ही मूर्ती तयार केली आहे.

दानवे-सावेंची रंगली फुगडी

उत्सवासाठी अतुल सावे, अंबादास दानवे, चंद्रकांत खैरे एकत्र आले होते. सर्वांनी संस्थान गणपती समोर असलेल्या बॅन्डच्या तालावर ठेका धरला. यासह दानवे आणि अतुल सावे यांची फुगडी चांगलीच रंगली. युतीत एकत्र आणि आता एकमेकांविरोधात असलेल्या या दोन्ही नेत्यांची फुगडी चर्चेचा विषय राहिली.

देव सत्याच्या बाजूने : सावे

शिवसेना नेते चंद्रकांत खैरे यांनी ग्रामदैवताकडे शिवसेची सत्ता येऊ दे, अशी मागणी केल्याचे सांगितले. तर याविषयी विचारल्यानंतर मंत्री अतुल सावे म्हणाले की, देव सदैव सत्याच्या बाजूने राहतो, हे दोन महिन्यांपूर्वीच सिद्ध झाले असल्याचे सांगत त्यांनी शिवसेना नेत्यांना टोला लगावला.