दरवर्षी गणेशोत्सवात एका गोष्टीचं आकर्षण सर्वांनाच असतं, ते म्हणजे मंडपाची सजावट. यावर्षी कित्येक ठिकाणी गणपतीसाठी चांद्रयान-3 ची सजावट करण्यात आली होती. यासोबतच राम मंदिर आणि इतर गोष्टींचे देखावे देखील पहायला मिळत आहेत. यातच आता गणपतीसाठी केलेला एक अनोखा देखावा व्हायरल होतो आहे.

गेल्या काही वर्षांमध्ये भारतात अ‍ॅनिमेची क्रेझ वाढली आहे. हीच क्रेझ आता गणेशोत्सवात देखील दिसून येत आहे. एका मंडळाने चक्क 'नारुतो' या प्रसिद्ध अ‍ॅनिमेचा देखावा बाप्पासाठी केलेला पहायला मिळालं. सोशल मीडियावर याचा व्हिडिओ व्हायरल होतो आहे.

या व्हिडिओमध्ये दिसतंय, की गणपतीच्या मूर्ती शेजारी 'नारुतो' अ‍ॅनिमेमधील उझुमाकी नारुतो आणि उचिहा सासुके या दोघांचे पोस्टर उभारण्यात आलेत. सोबतच मागच्या बाजूला सासुके आणि त्याचा मोठा भाऊ इताची यांचंही एक पोस्टर लावलं आहे. नम्मा ओरु थेनी नावाच्या इन्स्टा हँडलवरुन पोस्ट करण्यात आलेल्या या व्हिडिओला तीन लाखांहून अधिक लाईक्स आणि चार लाखांहून अधिक शेअर्स मिळाले आहेत.

काय आहे नारुतो?

नारुतो ही याच नावाच्या मांगावर (जपानी कॉमिक) आधारित अ‍ॅनिमे सीरीज आहे. यामध्ये उझुमाकी नारुतो हा लहान निंजा कशा प्रकारे आपल्या 'हिडन लीफ व्हिलेज'चा प्रमुख होतो, आणि मोठ्या निंजा युद्धाला थांबवतो याचा प्रवास दाखवण्यात आला आहे. मैत्री आणि प्रेम याबाबतचे अनेक पैलू या अ‍ॅनिमेमध्ये पहायला मिळतात. तसंच यामध्ये कित्येक चांगले अ‍ॅक्शन सीन्स देखील आहेत.