सोलापूर : ज्येष्ठा नक्षत्राच्या मुहूर्तावर रविवारी घरोघरी गौरीचे आगमन होणार आहे. त्यामुळे सध्या सजावट साहित्याच्या खरेदीला वेग आला आहे. गौरी मुखवट्यांबरोबरच आरास हा देखील प्रत्येकाच्याच जिव्हाळ्याचा विषय असतो. सध्या बाजारात विविध प्रकारचे दागिने, आभूषणे, त्याचबरोबर अनेक प्रकारची खेळणी विक्रीसाठी उपलब्ध झाली असल्याचे व्यापाऱ्यांनी सांगितले.

फिरते चक्र, भिंगरी लाईट असे नवनवीन प्रकारचे विद्युत रोषणाईचे साहित्य बाजारात विक्रीस आले आहेत. एलईडी व एलजीपीचे रंगीत दिवे विक्रीसाठी उपलब्ध आहेत. चिनी माळांपेक्षा स्वदेशी माळांचे दर अधिक असले तरी चायना मेड खरेदीसाठी ग्राहकांचा प्रतिसाद कमी आहे.

गौरींना बहुदा ताज्या फुलांचे हार घातले जातात. ताजे हार सर्वच भाविकांना अशक्‍य असल्याने दररोजच्या पूजेसाठी फुलांचा वापर केला जातो. मात्र, कृत्रिम हार आवर्जून गळ्यात घालण्यात येतात. पारंपरिक मण्यांच्या हारांसह कागदी, क्रेपच्या फुलांचे हार विक्रीसाठी उपलब्ध आहेत. शिवाय पर्यावरणपूरक सुगंधी हार बाजारात विक्रीसाठी आले आहेत.