ड्रग्स मिश्रीत च्युइंगम (Chewing Gum Candy) खाल्ल्यानं 23 वर्षीय तरुणीला आपला जीव गमवावा लागलाय. वास्तविक, दोन मैत्रिणींनी ही नशा कँडी खाल्ली होती. काही वेळातच या दोघीही आजारी पडल्या आणि नंतर एकीचा मृत्यू झाला. याप्रकरणी पोलिसांनी (Police) एका व्यक्तीला अटक केलीय.

द सनच्या रिपोर्टनुसार, हे प्रकरण पूर्व लंडनमधील (London) आहे. इथं दोन मैत्रिणींनी कँडी खाण्याचा प्लॅन केला. त्यापैकी एकीनं मेसेजिंग अॅपद्वारे क्लास बी कँडी ऑर्डर केली. त्यानंतर ही कँडी त्यांच्या घरी पोहोचवण्यात आली. ही कँडी Trrlli Peachie O's या ब्रँडची असून ही ड्रग्स मिश्रीत च्युइंगम कँडी खाल्ल्याबरोबर दोन्ही मुलींची प्रकृती खालावली. यानंतर दोघींना रुग्णालयात दाखल करण्यात आलं. मात्र, उपचारादरम्यान 23 वर्षीय तरुणीचा मृत्यू झाला.

पोलिस अधिकाऱ्यानं सांगितलं की, मुलींची वैद्यकीय चाचणी आणि कॅंडी सेवन केलेल्या रिपोर्टची (Medical Test Report) आम्ही वाट पाहत आहोत. सध्या तिच्या 21 वर्षीय मैत्रिणीला उपचारानंतर रुग्णालयातून डिस्चार्ज देण्यात आलंय. या प्रकरणी 37 वर्षीय लिओन ब्राउनला अटक करण्यात आलीय, असं त्यांनी नमूद केलं. महिन्याभरापूर्वीही अशीच एक घटना घडली होती. त्याचा आणि या घटनेचा काही संबंध आहे का याचा पोलिस तपास करत आहेत. या प्रकरणानंतर मुख्य अधीक्षक स्टुअर्ट बेल (Stuart Bell) यांनी नागरिकांना इशारा वजा आवाहन केलंय. सर्व नागरिकांनी बेकायदेशीर गोष्टींचं सेवन बंद करावं, असं आवाहन त्यांनी केलंय.