लिवरपूल (इग्लंड) : एक महिला आपल्या चार वर्षीय चिमुकल्याला आंघोळ घालत असताना एक धक्कादायक घटना घडली. आंघोळ करताना मुलाला साबण लावताच फेस तयार झाला. पाहता पाहता त्या फेसामध्ये आग लागली आणि मुलाचं शरीर पूर्ण जळालं. त्यानंतर त्याला तत्काळ रुग्णालयात दाखल करण्यात आलं. इंग्लंड येथील लिवरपूल (Liverpool, England) येथे ही घटना घडली.

स्थानिक माध्यमांच्या माहितीनुसार, पीडित मुलाचे नाव ऑस्कर बेडार्ड आहे. त्याचे वडील जोगाथन यांनी सांगितले, की ते त्यांच्या मुलाला आंघोळ घालत होते. त्यावेळी बाथरूमध्ये काही मेणबत्त्या देखील जळत होत्या. त्यामुळे ऑस्कर आंघोळ करताना खुश होता. त्याच्या अंगाला साबण लावताच फेस तयार झाला आणि त्या फेसामध्ये अचानक आग लागली. यामध्ये चेहऱ्यापासून तर पायापर्यंत ऑस्कर गंभीररित्या भाजला होता. अचानक आग लागल्याचे पाहून पालकांना धक्का बसला. पती-पत्नी दोघांनीही रुग्णालयाकडे धाव घेतली. चिमुकल्या ऑस्करवर बालरोतज्ज्ञांकडून उपचार करण्यात आले.

साबणामुळे जळालं शरीर?

लहान मुलांची त्वचा खूपच संवेदनशील असते. त्यामुळे मुलांसाठी रसायन नसलेले प्रोडक्ट्स वापरले जातात. मात्र, अनेकवेळा गरीबीमुळे पालक आपल्या मुलांसाठी स्वस्त प्रोडक्ट घेतात. त्या प्रोडक्टमुळे मुलांना काय धोका निर्माण होऊ शकतो याबाबत पालकांना तितकी माहिती नसते. ऑस्करसोबत पण नेमकं हेच झालं. साबणामुळे त्यांचं शरीर भाजल्याचं डॉक्टरांनी सांगितलं. त्यानंतर त्या साबणाच्या कंपनीविरोधात गुन्हा दाखल करण्यात आला, अशी माहिती ऑस्करचे वडील जोगाथन यांनी स्थानिक माध्यमांना दिली.