काबूल : तालिबानने सत्ता ताब्यात घेतल्यानंतर अफगाणिस्तानमध्ये (Afghanistan) झालेल्या विविध हल्ल्यांमध्ये जवळपास 400 नागरिकांचा मृत्यू झाला आहे. यापैकी 80 टक्के नागरिक इस्लामिक स्टेटशी (Islamic State) संलग्न असलेल्या गटांच्या हल्ल्यात मरण पावले आहेत. संयुक्त राष्ट्राने जारी केलेल्या अहवालात ही माहिती देण्यात आली आहे. हा अहवाल आल्यानंतर तालिबानच्या राजवटीत अफगाणिस्तानात अतिरेकी किती प्रमाणात वाढला आहे, हे स्पष्ट झाले आहे. तालिबानने अफगाणिस्तानचा ताबा घेतल्यानंतर हा पहिलाच मोठा मानवाधिकार अहवाल आहे. या अहवालात ऑगस्ट 2021 ते फेब्रुवारी 2022 अखेरपर्यंतची आकडेवारी देण्यात आली आहे. (UN Report On Taliban Government )

अमेरिकेच्या माघारीनंतर कब्जा

ऑगस्ट 2021 मध्ये, जेव्हा अमेरिकन सैनिक (American Army) 20 वर्षांचे युद्ध संपवून अमेरिकेत परतत होते, तेव्हा तालिबानने अफगाणिस्तानवर कब्जा केला. तेव्हापासून अफगाणिस्तानात इस्लामिक संघटनांचे हल्ले वाढले आहेत. अफगाणिस्तान आता महिला, पत्रकार आणि इतर अनेक गटांसाठी योग्य नसल्याचेही अहवालाता नमुद करण्यात आले आहे. या अहलावात इस्लामिक स्टेट खोरासान (ISIS-K) या संघटनेने केलेल्या हल्ल्यांमध्ये 397 नागरिकांचा मृत्यू झाल्याचेही सांगण्यात आले आहे.

यूएनच्या अहवालानुसार इस्लामिक स्टेट खोरासान ही जागतिक दहशतवादी संघटना इस्लामिक स्टेटची अफगाणिस्तानस्थित शाखा आहे. या काळात या दहशतवादी गटाशी संबंध असलेल्या 50 हून अधिक लोकांना मारण्यात आले आहे. त्यापैकी काहींचा छळ करण्यात आला, काहींचा शिरच्छेद करण्यात आला तर, अनेकांना रस्त्याच्या कडेला फेकण्यात आल्याने त्यांचा मृत्यू झाल्याचे सांगण्यात आले आहे.

अनेक अफगाण लोकांसाठी मानवी हक्कांची परिस्थिती चिंतेची बाब आहे. 2014 च्या उत्तरार्धात पूर्व अफगाणिस्तानमध्ये इस्लामिक स्टेट खोरासान पहिल्यांदा दिसून आले होते. तालिबानने ताबा घेतल्यानंतर त्याची ताकद वाढली असून, अलीकडच्या काही महिन्यांत त्यांनी अनेक आत्मघाती हल्ले केले असल्याचे मानवाधिकार उच्चायुक्त मिशेल बॅचेलेट यांनी अहवाल सादर करताना भाषणात सांगितले आहे. यात गेल्या वर्षी ऑगस्टमध्ये काबूल विमानतळावर झालेल्या आत्मघातकी हल्ल्याचा समावेश आहे. ज्यामध्ये 13 अमेरिकन सैनिकांसह अनेक सामान्य लोकही मारले गेले होते.