चीनच्या अनहुई प्रांतातून एक धक्कादायक प्रकार समोर आला आहे. एका सहा वर्षांच्या मुलाने आईच्या मारापासून वाचण्यासाठी चक्क पाचव्या मजल्यावरून उडी मारली. चीनमधील सोशल मीडियावर या घटनेचा व्हिडिओ मोठ्या प्रमाणात व्हायरल झाला आहे. लोकांनी देशातील बाल संरक्षण कायद्यावर प्रश्न उपस्थित केले आहेत.

साऊथ चायना मॉर्निंग पोस्टने याबाबत वृत्त प्रसिद्ध केले आहे. यामध्ये दिलेल्या माहितीनुसार, ही घटना २५ जून रोजी घडली होती. आई ओरडत असल्यामुळे एक मुलगा आपल्या घराच्या खिडकीमधील एसी युनिटवर जाऊन उभारला होता. पाचव्या मजल्यावर राहत असलेला हा मुलगा बाहेर उभा पाहून खाली असलेले लोक त्याला ओरडून आत जाण्यास सांगत होते.

यावेळी अचानक त्याची आई खिडकीत आली. तिच्या हातात एक काठी देखील होती. या काठीने ती त्याला मारण्याचा प्रयत्न करत होती. हे पाहून घाबरलेल्या त्या मुलाने तिथून थेट खाली उडी मारली. खाली असलेले लोक यावेळी आईलाही ओरडून मुलाला मारू नको म्हणून सांगत होते. मात्र, अचानक मुलाने खाली उडी मारल्यामुळे एकच गोंधळ उडाला.

आत येण्यासाठीच ओरडत होती आई

पोलिसांनी यानंतर वीबो या सोशल मीडिया साईटवर माहिती दिली. ही आई आपल्या मुलाला मारत नव्हती, तर आत येण्यासाठी सांगत होती. ती काठी देखील केवळ त्याला भीती दाखवण्यासाठी होती असं पोलिसांनी म्हटलं आहे. दरम्यान, हा मुलगा जिवंत असून त्याच्यावर उपचार सुरू असल्याची माहिती पोलिसांनी दिली आहे.

आईच्या मारापेक्षा उडी परवडली

मात्र प्रत्यक्षदर्शींनी असं म्हटलं आहे, की ही आई आपल्या मुलाला मारतच होती. त्यांनी मनाई केल्यानंतरही ती मुलाला मारत राहिली. या मुलाला आईची एवढी भीती बसली होती, की त्या तुलनेत त्याला खाली उडी मारणं हा चांगला पर्याय वाटला; असं काही नेटीझन्सनी म्हटलं आहे. चीनमधील सोशल मीडिया साईटवर या घटनेच्या व्हिडिओला १० मिलियन पेक्षा अधिक व्ह्यूज मिळाले आहेत.