वॉशिंग्टन - अफगाणिस्तानमधून (Afghanistan) सुटका केलेल्या आणि जोखमीची भीती असलेल्या अफगाणी नागरिकांना (Citizens) तात्पुरत्या काळासाठी शरण (Aslyum) देण्‍यास १३ देशांनी मान्यता (Permission) दिली आहे. अमेरिकेसह १३ देशांनी बाहेर काढलेल्या निर्वासितांना नेण्यासाठी ‘ट्रान्झिट’ ठाणे देशाचा वापर करू देण्यास आणखी काही देशांनी परवानगी दिली आहे. ही माहिती अमेरिकेचे परराष्ट्रमंत्री अँटोनी ब्लिंकन यांनी शुक्रवारी दिली.

ते म्हणाले, ‘‘ज्या संभाव्य अफगाणी शरणार्थींच्या पुनर्वसनाची व्यवस्था अमेरिकेत झालेली नाही अशा निर्वासितांना अल्बानिया, कॅनडा, कोलंबिया, कोस्टारिका, चिली, कोसोव्हो, उत्तर मॅसेडोनिया, मेक्सिको, पोलंड, कतार, रवांडा, युक्रेन आणि युगांडा या देशांनी निर्वासितांना आसरा देण्याची तयारी दाखविली आहे. ‘ट्रान्झिट’ देशांमध्ये बहारीन, ब्रिटन, डेन्मार्क, जर्मनी, इटली, कझाकिस्तान, कुवेत, कतार, तुर्कस्तान, संयुक्त अरब अमिरात आणि उझबेकिस्तान यांचा समावेश आहे.’’

अन्य देश मदत करण्याचा विचार करीत आहेत, याचा आम्हाला आनंद वाटत आहे, असे ब्लिंकन म्हणाले. विदेशातील अमेरिकी नागरिकांच्या सुरक्षा व संरक्षणापेक्षा आमच्यासाठी इतर कशालाही महत्त्व नाही. तसेच अन्य सहकारी देश व धोक्यात असलेल्या अफगाणी नागरिकांसाठी आम्ही आमची जबाबदारी पेलण्यास कटिबद्ध आहोत, असे त्यांनी सांगितले.