काबूल - अफगाणिस्तानमधील असदाबाद शहरात देशाच्या स्वातंत्र्यदिना निमित्त सुरु असलेल्या तालिबानींच्या रॅलीमध्ये बेछूट गोळीबार करण्यात आला. यामध्ये अनेक लोकांचा मृत्यू झाल्याचे वृत्त रॉयटर्सने दिले आहे. अफगाणिस्तानमध्ये अजुनही रक्तपात सुरु आहे.

रॉयटर्सने दिलेल्या वृत्तानुसार, असदाबादमध्ये अफगाणिस्तानच्या स्वातंत्र्यदिना निमित्त काही लोक रॅली काढत होते. यावेळी देशाचा झेंडा फडकावणाऱ्या काही लोकांवर तालिबानींनी गोळीबार केला. यानंतर चेंगराचेंगरीची घटना घडली. यामध्ये किती लोकांचा जीव गेला हे समोर आलेलं नाही. तसंच चेंगराचेंगरीत मृत्यू झाला की गोळीबारात याचीही माहिती समजू शकलेली नाही.

तालिबानने अद्याप यावर कोणतीही प्रतिक्रिया दिलेली नाही. दरवर्षी 19 ऑगस्टला अफगाणिस्तानमध्ये स्वांतंत्र्य दिन साजरा केला जातो. याआधी काबूल विमानतळावर महिला आणि मुलांवर तालिबानींकडून गोळीबार करण्यात आला होता. विमानतळावरून गर्दी कमी करण्यासाठी आणि लोकांना मागे हटवण्यासाठी गोळीबार करण्यात आला होता.

काबुलसह पूर्वेकडील शहरांमध्ये आंदोलन सुरु आहे. या आंदोलनाला तालिबानिंविरोधातील नेत्यांकडून पाठिंबा देण्यात आला आहे. दरम्यान, तालिबानच्या भीतीने देशातून रविवापासून 8 हजार जणांनी देश सोडला असल्याचं सुरक्षा विभागातील अधिकाऱ्यांनी म्हटलं आहे.