युद्धग्रस्त युक्रेनमध्ये अडकलेल्या २१९ भारतीयांना घेऊन एअर इंडियाचं पहिलं विमान काल भारतात दाखल झाले. या विद्यार्थ्यांनी कशा प्रकारे संघर्ष करत रोमियातील पिक अप पॉईंटपर्यंत पोहचले, विद्यार्थ्यांची अवस्था काय होती याबाबत एअर इंडियाच्या कॅबिन क्रू इन चार्ज रजनी पॉल यांनी एएनआयला माहिती दिली. '' युक्रेनमध्ये अडकलेल्या मुलांना त्यांच्या पालकांपर्यंत सुखरूप पोहचवावे अशी आमची इच्छा होती. आम्हाला ही संधी मिळाली याचा आम्हाला खूप अभिमान वाटतो.'' अशी भावना त्यांनी यावेळी व्यक्त केली.

युद्धग्रस्त युक्रेनमध्ये अडकलेल्या २१९ भारतीयांना घेऊन एअर इंडियाचं विमान मुंबईतील छत्रपती शिवाजी महाराज आंतरराष्ट्रीय विमानतळावर काल रात्री दाखल झाले होते. दुपारी रोमानियाची राजधानी बुचारेस्ट इथून या विमानाने उड्डाण केलं होतं. हे विमान भारतीय वेळेनुसार रात्री 9 वाजता मुंबईतील छत्रपती शिवाजी महाराज आंतरराष्ट्रीय विमानतळावर पोहोचेल असं सांगण्यात येत होतं. पण ते रात्री ८ वाजेपर्यंतच मुंबईत दाखल झालं आहे. यापार्श्वभूमीवर केंद्रीय मंत्री पियूष गोयल हे या भारतीय नागरिकांच्या स्वागतासाठी मुंबई विमानतळावर उपस्थित होते. यावेळी त्यांनी विद्यार्थ्यांसोबत बातचित केली होती.

दरम्यान, युक्रेनमध्ये अडकलेली मुलं खूप त्रास सहन करून पिक अप पाईंटवर पोहचले होते. याबाबत रजनी पॉल यांनी काही मुलांसोबत एअरपोर्टवर बातचीत केली होती, त्याबाबत त्यांनी सांगितले की, ''काही जण ९-१० किलोमीटर आपले सामान घेऊन पायी चालत पिक -अप पॉईंटवर आले होते. काही जणांना एअरपोर्टवर फक्त एक चॉकलेट खाण्यासाठी मिळाले होते.''

युक्रेनमधील विद्यार्थ्यांच्या स्थितीबाबत सांगताना पॉल या भावून झाल्या होत्या, त्या म्हणाल्या की, ''या मुलांचे पालक त्यांच्यासाठी फक्त प्रार्थना करत होते. व्हिडिओ कॉलवर पालक मुलांना सांगत होते की, कृपया घरी सुखरूप परत या, आम्ही तुमची वाट पाहात आहोत.''

''आपल्या देशाने, मंत्रालायाने आणि एअर इंडियाने युक्रेनमध्ये अडकलेल्या नागरिकांना परत भारतात आणण्याचे हे काम केले आहे त्याचे कौतुक करावे तितके कमी आहे.'' अशी भावना देखील पॉल यांनी यावेळी व्यक्त केली.