काबूल : अफगाणिस्तानातील सरकारला उलथवून टाकून आपला ताबा मिळवल्यानंतर तालिबाननं आता आपलं सरकार स्थापन करण्याच्या हालचाली सुरु केल्या आहेत. दरम्यान, अफगाणिस्तानचे राष्ट्रपती अश्रफ घनी यांनी देश सोडल्यानंतर अफगाणिस्तानचे पहिले उपराष्ट्राध्यक्ष अमरुल्लाह सालेह यानं स्वतःला अफगाणिस्तानचा काळजीवाहू राष्ट्राध्यक्ष घोषीत केलं आहे.

अमरुल्लाह सालेह यांनी याबाबत ट्विट करुन घोषणा केली. त्यांनी म्हटलं की, "अफगाणिस्तानच्या संविधानानुसार राष्ट्राध्यक्षांच्या अनुपस्थितीत त्यांच्या देशातून पळून जाणे, राजीनामा देणे किंवा मृत्यू झाल्याच्या स्थितीत उपराष्ट्रपती काळजीवाहू राष्ट्रपती घोषीत होतो. मी सध्या देशातच असून अधिकृत काळजीवाहू राष्ट्रपती आहे. मी सर्व नेत्यांना त्यांचं समर्थन आणि सहकार्याची मागणी करतो." पण सालेह यांच्या या घोषणेवर अद्याप तालिबानकडून कुठलीही प्रतिक्रिया आलेली नाही.