कोरोना महामारीनं जगभरात हाहाकार माजवलाय. लहानापासून वयोवृद्धांपर्यंत सर्वांनाच कोरोना विषाणूनं आपल्या कवेत घेतलं आहे. कोट्यवधी लोक कोरोनाबाधित झाले आहेत. तिसऱ्या लाटेचा लहान मुलांवर जास्त परिणाम होणार, असल्याचं मत अनेक तज्ज्ञांनी व्यक्त केलं आहे. त्यामुळे पालकांमध्ये चिंतेचे वातावरण निर्माण झालं आहे. अशा परिस्थितीत लहान मुलांच्या भविष्यासाठी अमेरिकेनं मोठ पाऊल उचललं आहे. अमेरिकेच्या अन्न आणि औषध मंत्रालयानं (एफडीए) सोमवारी (10 मे) 12 ते 15 वयोगटातील मुलांसाठी लस टोचण्याला परवानगी दिली आहे. फायजर-बायोएनटेक (pfizer bionotech) ही कोरोना लस लहान मुलांना टोचण्यासाठी एफडीएनं आपतकालीन (emergency) मान्यता दिली आहे.

एफडीएने सांगितलं की, कोरोना विरोधातील लढाईत आणखी एक महत्वपूर्ण पाऊल उचलत आहोत. 12 ते 15 वयोगटातील मुलांच्या लसीकरणासाठी फायजर-बायोएनटेक (pfizer bionotech) कोविड-19 लसीला आपतकालीन अधिकृत मंजूरी दिली. गेल्या काही दिवसांपासून लहानग्यांसाठी कोरोना लस कधी येणार हा प्रश्न विचारला जात होता. मात्र, अमेरिकेनं जगाला याचं उत्तर दिलं आहे. आता 12 वर्षावरील सर्वांचं अमेरिकेत लसीकरण होणार आहे. तरिही 12 वर्षांआतील मुलांचं काय? हा प्रश्न अद्याप कायम आहे.

दरम्यान, भारताच्या केंद्रीय आरोग्य मंत्रालयाच्या माहितीनुसार, भारतानं आतापर्यंत 17 कोटी लोकांचं लसीकरण पूर्ण केलं आहे. भारतानं अवघ्या 114 दिवसांत 17 कोटींपेक्षा जास्त लोकांचं लसीकरण केलं आहे. इतक्या लोकांचं लसीकरण करण्यासाठी अमेरिकेला 115 तर चीनला 119 दिवस लागले होते.