नवी दिल्ली : डेन्मार्कसहित युरोपातील अनेक देशांनी एस्ट्राझेनेका लसीच्या वापरावर काही काळासाठी स्थगिती आणली आहे. यावर आता एस्ट्राझेनेकाने आपलं स्पष्टीकरण दिलं आहे. कंपनीने म्हटलंय की, ज्या लोकांना ही लस दिली गेली होती, त्या लोकांच्या सेफ्टी डेटा रिव्ह्यूमध्ये लसीमुळे रक्तात गुठळ्या व्हायचा कसलाही पुरावा मिळाला नाहीये. लसीमुळे रक्तात क्लॉटींगच्या तक्रारीनंतर कंपनीने ब्रिटन आणि युरोपियन युनियनमध्ये एक कोटी सत्तर लाख लोकांच्या सेफ्टी डेटाचा रिव्ह्यू (आरोग्य अहवालाचे परीक्षण) घेतला आहे. या रिव्ह्यूनंतर एस्ट्राझेनेकाने स्पष्टीकरण देत म्हटलंय की लसीमुळे कसल्याही प्रकारचा धोका नाहीये. 

हेही वाचा - 'कोविशील्ड' लसीमुळे रक्तात गुठळ्या? खबरदारी म्हणून आयर्लंडमध्येही लसीकरणास ब्रेक

आयर्लंडच्या आरोग्य अधिकाऱ्यांनी काल रविवारी या लसीच्या वापरावर काही काळासाठी बंदी घातली आहे. आयर्लंडचे डिप्टी चीफ मेडिकल ऑफिसर डॉ. रोनन ग्लिन यांनी म्हटलं की, नॉर्वेच्या मेडिसिन्स एजेन्सीच्या म्हणण्यानुसार, एस्ट्राझानेकाची लस दिल्यानंतर वयस्कर लोकांमध्ये रक्तात गुठळ्या होण्याची चार प्रकरणे समोर आली आहेत. त्यानंतर या लसीवर प्रतिबंध आणण्याचा निर्णय घेण्यात आला. त्यांनी हेही स्पष्ट केलं की, लसीकरण आणि या प्रकरणांच्या दरम्यानचा सहसंबंध अद्याप सुस्पष्ट नाहीये. मात्र, खबरदारी म्हणून हा प्रतिबंध लागू करण्यात आला आहे.  ऑस्ट्रियाने देखील खबरदारी म्हणून हा निर्णय घेतला आहे. तर फ्रान्स, पोलंड आणि नायजेरिया म्हटलंय की ते या लसीचा वापर सुरु ठेवतील. ब्रिटनने देखील स्पष्ट केलंय की एस्ट्राझेनेकाच्या लसीमुळे लोकांचं रक्त गोठण्यासंदर्भात कसलीही माहिती मिळाली नाहीये. ब्रिटनमध्ये एस्ट्राझेनेका लसीचे 1.1 कोटीहून अधिक डोस लोकांना दिले गेले आहेत.  युरोपातील अनेक देशांनी एस्ट्राझेनकाच्या कोरोना लशीचा वापर थांबवला आहे. जागतिक आरोग्य संघटनेनं एस्ट्राझेनकाच्या लशीचा वापर थांबवण्याचं कोणतंही कारण नसल्याचं म्हटलं आहे. युरोपात काही देशांमध्ये एस्ट्राझेनकाच्या लसीचे दुष्परिणाम होत असल्याचं समोर आलं होतं. 

भारतही करणार कोविशील्डची चिकित्सा
फार्मा कंपनी एस्ट्राझेनेका आणि ऑक्सफर्ड युनिव्हर्सिटीद्वारे विकसित केल्या गेलेल्या कोरोना लसीबाबत युरोपमध्ये काही गंभीर साईड इफेक्ट्स दिसल्याने भारतात देखील आता या लसीबाबत खबरदारी म्हणून चिकित्सा करण्यात येणार आहे.