किव्ह : रशिया व युक्रेनचे एकमेकांवर हल्ले सुरूच आहेत. रशियाने गुरुवारी (ता.५)पूर्व युक्रेनमधील रोझे गावात क्षेपणास्त्राचा हल्ला केला. यात ५१ नागरिक ठार झाले. यात मुलांचाही समावेश आहे. युद्धादरम्यान रशियाने या महिन्यांत केलेल्या शक्तीशाली स्फोटांपैकी एक आहे, असा दावा युक्रेनचे व्होलोदिमीर झेलेन्स्की आणि अन्य अधिकाऱ्यांनी केला आहे.

युद्धात मरण पावलेल्या युक्रेनी सैनिकांच्या शोकसभेसाठी रोझेमधील एका दुकानाजवळ सुमारे ६० जण उपस्थित असताना हा हल्ला झाला. यानंतर दुकानाची केवळ माती उरली होती. त्याच्या ढिगाऱ्याखाली गाडले गेल्याने ५१ जण ठार झाले.

त्यातून बचालेल्यांचा शोध आज सुरू होता. मृतांच्या शरीराचे अवयव जवळ असलेल्या मुलांच्या खेळाच्या मैदानावर पसरले होते. या मैदानाचेही हल्ल्यात मोठे नुकसान झाले आहे. पोलिसांनी दिलेल्या माहितीनुसार हल्ल्यात ५१ जणांचा मृत्यू झाला असून सहा जण जखमी तर तीन नागरिक बेपत्ता आहेत.

रशियाने जाणीवपूर्वक केला हल्ला

झेलेन्स्की हे सध्या स्पेनमधील ५० युरोपिय नेत्यांच्या बैठकीत सहभागी झाले आहेत. युक्रेनच्या मित्र देशांकडून पाठिंबा मिळविण्यासाठी ते तेथे गेले आहेत. ‘‘हा हल्ला निसंशय क्रूर असून रशियाने हेतुपुरस्सर केलेले हे दहशतवादाचे कृत्य आहे,’’ असे सांगत झेलेन्स्की यांनी निषेध केला. ब्रिटनचे पंतप्रधान ऋषी सुनक यांनीही या हल्ल्याचा निषेध केला आहे.

रशियाने रोझेवर केलेला हल्ला भयानक आहे. युक्रेनच्या शूर लोकांना त्यांच्या स्वातंत्र्यासाठी, लोकशाहीसाठी लढण्यासाठी अमेरिका सर्वोतपरी मदत का करत आहे, हे यातून समजू शकते.

- कॅरिन जीन -पियरे, माध्यम सचिव, व्हाईट हाऊस , अमेरिका