Barack Obama : अमेरिकेचे माजी राष्ट्राध्यक्ष बराक ओबामा हे सध्या चांगलेच चर्चेत आहेत. याला कारण ठरतंय त्यांनी आपल्या एक्स गर्लफ्रेंडला लिहिलेली एक चिठ्ठी. या चिठ्ठीमध्ये बराक ओबामांनी आपल्या लैंगिक फॅन्टसीजबाबत विस्ताराने लिहिलं आहे.

बराक ओबामांनी आपल्या पूर्वाश्रमीच्या गर्लफ्रेंड्सना लिहिलेली पत्रं आता पुन्हा एकदा समोर आली आहेत. बायोग्राफर डेव्हिड गॅरो यांनी एका मुलाखतीत ओबामांच्या तीन एक्स गर्लफ्रेंड्सकडून त्यांनी लिहिलेली पत्रं मिळवल्याचा दावा केला आहे. यातील एका पत्रामध्ये ओबामा हे स्त्री-पुरूष आणि समलिंगी संबंधांबाबत आपले विचार मांडत आहेत.

अ‍ॅलेक्स मॅक्निअर या तरुणीला बराक ओबामा यांनी 1982 साली हे पत्र लिहिलं होतं. ओबामा हे तेव्हा 21 वर्षांचे होते. हे दोघेही लॉस एँजेलिसमधील ऑक्सिडेंटल कॉलेजमध्ये शिकत होते. अ‍ॅलेक्सने आपल्याला हे पत्र दाखवलं, आणि यातील एक पॅराग्राफ हा समलिंगी संबंधांबाबत असल्याचंही त्यांनी सांगितलं, असं डेव्हिड मुलाखतीत म्हणाले. हिंदुस्तान टाईम्सने याबाबतचं वृत्त प्रसिद्द केलं आहे. (Global News)

काय लिहिलंय पत्रात?

आपल्या पत्रात ओबामा लिहितात, "समलिंगी संबंधांच्या बाबतीत बोलायचं झाल्यास, हा स्वतःला वर्तमानापासून दूर करण्याचा प्रयत्न आहे असं मला वाटतं. मी स्वतःदेखील दररोज पुरूषांसोबत संबंध ठेवतो, मात्र केवळ माझ्या कल्पनेत."

"माझं मन हे मोठ्या प्रमाणात उभयलिंगी आहे. हे प्रमाण तोपर्यंत वाढायला हवं, जोपर्यंत मी महिला किंवा पुरूष असा विचार न करता लोकांच्या दृष्टीने विचार करत नाही. पण शरीराचा विचार करता मी नक्कीच एक पुरूष आहे, आणि शारीरिकदृष्ट्या मी आयुष्यातील ही आकस्मिकता स्वीकारण्याचा निर्णय घेतला आहे.", असंही ते लिहितात.

ओबामांनी समलिंगी संबंधांबाबत आपले विचार अधिक विस्तृतपणे या पत्रात लिहिल्याचं अ‍ॅलेक्सने म्हटलं आहे. आपण एक पुरूष असून, केवळ कल्पनेत इतर पुरूषांचा विचार करतो, असं ओबामांनी यात स्पष्ट केलं आहे. ओबामांची ही पत्रं अ‍ॅलेक्सने एमॉरी युनिवर्सिटीला विकली आहेत. त्यामुळे ही पत्रं आता या विद्यापीठाच्या ताब्यात आहेत.