ब्राझेलिया- कोरोना महासाथीचे थैमान जगभर सुरुच आहे. जगभरात कोरोनाबाधितांचा आकडा झपाट्याने वाढत आहे. ब्राझिल देशामध्ये तर कोरोना विषाणूने हाहाकार माजवला आहे. ब्राझिलमध्ये कोरोनाबाधित रुग्णांचा आकडा 10 लाखांच्या पुढे गेला आहेत. त्यामुळे सर्वाधिक कोरोनाबाधितांच्या संख्येमध्ये अमेरिकेपाठोपाठ ब्राझिलचा क्रमांक लागला आहे. कोरोनाग्रस्तांची संख्या हाताबाहेर जात असल्याने ब्राझिलची चिंता वाढली आहे. ब्राझिलमध्ये सध्या 10 लाखांच्या पुढे कोरोनाग्रस्त असल्याचं आरोग्य मंत्रालयाकडून सांगण्यात आलं आहे. पण, ही संख्या यापेक्षा खूप अधिक असण्याची शक्यता आहे. ब्राझिलमध्ये कोरोनाबाधित रुग्णांची संख्या सध्या सांगण्यात येत असलेल्या आकडेवारीपेक्षा सात पटीने अधिक असल्याचा दावा अभ्यासकांनी केला आहे. ब्राझिलमध्ये दर एक लाख लोकांमागे फक्त 14 कोविड चाचण्या घेतल्या जात आहेत, असं जॉन हॉपकिन्स विद्यापीठाने सांगितलं आहे.
ब्राझिलमध्ये एकूण कोरोनाबाधितांची संख्या 1,032,913 झाली आहे. तसेच देशात गुरुवारी 50000 कोरोनाबाधितांची नोंद झाली आहे. यामुळे ब्राझिलमध्ये असामान्य आणि अभूतपूर्व अशी परिस्थिती निर्माण झाली आहे. देशाची आरोग्य व्यवस्था फारशी सक्षम नसल्याने येत्या काळात यापेक्षा अधिक गंभीर समस्येला सामोरे जावे लागण्याची शक्यता आहे. गेल्या तीन महिन्यात ब्राझिलमध्ये 50 हजार कोरोनाबाधितांचा मृत्यू झाला आहे. मात्र, देशात कडक टाळेबंदी लागू करण्यात आली नाही. कारण या रोगामुळे निर्माण झालेल्या परिस्थितीपेक्षा ठप्प अर्थव्यवस्थेमुळे अधिक गंभीर प्रश्न निर्माण झाले असते, असं ब्राझिलचे अध्यक्ष जैर बोलसानारो म्हणाले आहेत. तसेच काही प्रलिंबित केसेसमुळे गुरुवारी 50 हजार कोरोनाबाधितांची नोंद झाल्याचं त्यांनी म्हटलं आहे.
आतापर्यंत जगभरात 87 लाखांपेक्षा अधिक कोरोनाबाधित आढळले आहेत. एकमेव महासत्ता असलेल्या अमेरिकेला या महासाथीने अधिक पिडले आहे. अमेरिकेत आतापर्यंत 22 लाखांपेक्षा अधिक कोरोनाबाधितांची नोंद झाली आहे. तर आतापर्यंत 1 लाख 12 हजार लोकांना कोरोनामुळे आपला जीव गमवावा लागला आहे. कोरोनाबाधितांच्या संख्येत ब्राझिल दुसऱ्या क्रमांकावर आहे. तर तिसऱ्या क्रमांकावर रशिया आहे. रशियामध्ये आतापर्यंत 5 लाख 60 हजार कोरोनाग्रस्त आढळले आहेत. भारतामध्येही कोरोनाबाधितांची संख्या वाढत आहे. कोरोनाग्रस्तांची संख्या 4 लाखांच्या जवळ जाऊन ठेपली आहे. त्यामुळे कोरोनाबाधितांच्या संख्येत भारत चौथ्या स्थानी आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.