नवी दिल्लीः मध्य आणि दक्षिण चिलीच्या जंगलामध्ये आगीमुळे आतापर्यंत ४६ जणांचा मृत्यू झाला आहे. चिलीच्या राष्ट्रपतींनी याची पुष्टी केलीय. आगीमुळे मृत्यू पावणाऱ्यांची संख्या वाढण्याची शक्यता आहे. रेस्क्यू टीमच्या वतीने आगीमुळे भस्मसात झालेल्या घरांचा तपास सुरु झाला आहे. आग वरचेवढ वाढत असून त्यामुळे धोका वाढत चालला आहे. चिली सरकारने आणीबाणीची घोषणा केली आहे.

चिलीच्या जंगलांमध्ये आग लागणं नवीन बाब नाही. येथील तापमान ४० अंशांवर पोहोचलं आहे. त्यामुळेच संकट आणखीनच वाढलं आहे. ही आग मुख्यत्वे करुन वालपरिसो पर्यटन क्षेत्राच्या आसपास लागली आहे. येथील हजारो हेक्टरवरील जंगल नष्ट झालेलं आहे. किनाऱ्यालगतच्या शहरामध्ये मोठ्या प्रमाणावर धूर वाढला असून लोकांनी घरं सोडून जाण्यास सुरुवात केलीय.

आपत्कालनी कार्यवाहीचा भाग म्हणून सरकारने शनिवारपासूनच संचारबंदी लागू केलीय. गृहमंत्री कॅरोलिना तोहा यांनी शनिवारी १९ जणांचा मृत्यू झाल्याचं सांगितलं होतं. शिवाय १५८ ठिकाणी आग लागली असून त्यामुळे ४३ हजार क्षेत्र बाधित झालेलं आहे.

याशिवाय चिलीतील आगीमुळे राजधानीच्या नैऋत्येकडील एस्ट्रेला आणि नवीदाद या शहरातील एक हजार घरं जळून खाक झाली आहेत. पिचिलेमूच्या सर्फिंग रिसॉर्टजवळील लोकांना स्थलांतरित व्हावं लागलं आहे. आणखीही अनेकांना घरं सोडून जावं लागणार असल्याचं स्थानिकांचं म्हणणं आहे.