बुडापेस्ट : जगभरात सध्या कोरोनाच्या संकटाने थैमान घातलं आहे. कोरोना विषाणूच्या संसर्गावर अद्याप कोणतंही प्रभावी औषध उपलब्ध झालं नाहीये. मात्र, अनेक देशांनी आपापल्या लशी उपलब्ध केल्या आहेत. यातील अनेक लशी या प्रभावी आहेत. लशींच्या या प्रभावी असण्याबद्दल अनेक अभ्यास सध्या सुरु आहेत. चीनने विकसित केलेल्या लशीबाबत देखील सध्या अनेक अभ्यास सुरु आहेत. चीनने विकसीत केलेली सिनोफार्म ही कोरोना प्रतिबंधक लस ही फारशी प्रभावी ठरत नसल्याचे एका अभ्यासातून उघड झाले आहे. यामुळे ज्या देशांमध्ये या लशीचा वापर करून लसीकरण मोहिम राबविली गेली आहे, त्याठिकाणच्या जनतेच्या आरोग्याबाबत प्रश्‍नचिन्ह उपस्थित केले जात आहे.

हंगेरीमध्ये याबाबतचा अभ्यास करण्यात आला. सिनोफार्म लशीचा दुसरा डोस घेतल्यानंतर दोन आठवड्यांनी विविध वयोगटातील ४५० जणांच्या रक्ताचे नमुने तपासण्यात आले. यानुसार, वयाच्या पन्नाशीच्या आतीत नागरिकांना लशीमुळे ९० टक्के संरक्षण मिळते. मात्र, त्याहून अधिक वयाच्या नागरिकांना लस देताना प्रभाव कमी होत असल्याचेही आढळून आले आहे. ८० वर्षांपुढील नागरिकांमध्ये तर लस केवळ ५० टक्केच प्रभावी ठरत असल्याचे दिसून आले आहे. हा अहवाल ऑनलाइन प्रसिद्ध करण्यात आला असून अद्याप इतर शास्त्रज्ञांनी त्याला मान्यता दिलेली नाही. चीनच्या आरोग्य यंत्रणेने या अहवालावर प्रतिक्रिया देण्यास नकार दिला आहे.

या अभ्यासाशी संबंधित नसलेल्या हाँगकाँग युनिव्हर्सिटीच्या व्हायरोलॉजिस्ट जिन डोंग-यान यांनी म्हटलंय की, ही लस घेतल्यानंतर अत्यधिक जोखीम असलेल्या लोकांना या विषाणूंचा प्रतिकार कमी होतो, ही बाब अत्यंत चिंताजनक आहे.