नवी दिल्लीः हवामानातील बदलांमुळे सध्या वातावरण तापलेलं आहे. या मुद्द्यावरुन सर्वत्र वादंग पहायला मिळत आहे. संयुक्त राष्ट्र विकास कार्यक्रम आणि क्लायमेट इम्पॅक्ट लॅबने एक आश्चर्यकारक खुलासा केलाय.

'यूएनडीपी'च्या अहवालानुसार, वेळेत कार्बन उत्सर्जनाला प्रतिबंध केला नाही तर जगातल्या काही भागांमध्ये याचे विपरित परिणाम दिसून येतील. जगभरात कॅन्सरचे रुग्ण वाढतील, असं या अहवालामध्ये म्हटलं आहे.

संयुक्त राष्ट्र विकास कार्यक्रम आणि क्लायमेट इम्पॅक्ट लॅब या दोन्ही संस्था वातावरणातील बदलांवर संशोधन करीत आहेत. 'यूएनडीपी'ने सांगितलं की, या समस्येवर केवळ पर्याय शोधून चालणार नाही तर खंबीर पावलं उचलावी लागतील. या वातावरणातील बदलांमुळे मानवाचा पुढचा मार्ग अंधकारमय होण्याचा धोका आहे.

वातावरणीय बदलांमुळे मृत्यूदर तर वाढेलच शिवाय जगण्याचा संघर्ष वाढेल. यूएनडीपीने सांगितलं की, या शतकाच्या अखेर कर्करोगामुळे होणाऱ्या मृत्यूची संख्या वाढू शकते. ह्यूमन क्लायमेट हॉरिझॉनच्या अहवालानुसार हवेतील कार्बन डायऑक्साईडचा स्तर वरचेवर धोकेदायक होतोय. त्यामुळेच जमिनीचं तापमान वाढत आहे. या बदलांना थांबवलं नाही तर हे बदल मानवजातीसाठी हे घातक ठरतील.

या अहवालामध्ये ढाका आणि बांगलादेशचं उदाहरण देण्यात आलेलं आहे. येथे उत्सर्जनाचं प्रमाण जास्त असेल. त्यामुळे कॅन्सरचं प्रमाण वाढेल. यामुळे होणारे मृत्यू हे देशाच्या सध्याच्या वार्षिक मृत्यूदराच्या दुप्पट असू शकतात. अपघातांमुळे होणाऱ्या मृत्यूच्या दहापट. हे जास्त भीषण असल्याचं अहवालामध्ये नमूद करण्यात आलेलं आहे.