जगभरात कोरोनाला रोखण्यासाठी प्रयत्न होत आहे. पहिली, दुसरी लाट आल्यानंतर आता तिसरी लाट आल्यास ती थोपवण्याची तयारीही अनेक देशांनी केली आहे. त्याच पार्श्वभूमीवर लसीकरण मोहिमेला वेग आला आहे. मात्र जगात तीन देश असेही आहेत जिथं अद्याप लस देण्यात आलेली नाही. उत्तर कोरिया, बुरुंडी आणि इरिट्रिया हे तीन देश आहेत. विशेष म्हणजे चीनचा मित्र असूनही उत्तर कोरियात अद्याप लसीकरण सुरु झालेलं नाही.

जगभरात आतापर्यंत पाच अब्जहून अधिक कोरोना लशीचे डोस देण्यात आले आहेत. यापैकी जवळपास 40 टक्के डोस हे चीनमध्ये देण्यात आले आहेत. चीनने 1.96 अब्ज डोस आतापर्यंत दिले आहेत. तर भारतात 59 कोटी, अमेरिकेत 36.3 कोटी डोस दिले गेले आहेत.

दहा लाखांहून अधिक लोकसंख्या असलेल्या देशांमध्ये युएई लसीकरणात आघाडीवर आहे. तिथे दर 100 लोकांमध्ये 179 डोस देण्यात आले आहेत. याचाच अर्थ असा की जवळपास 75 टक्के लोकंसख्येला लशीचे दोन्ही डोस देण्यात आले आहेत. कोरोनाला रोखण्यासाठी जगभरातील देश युद्धपातळीवर हालचाली करत असताना उत्तर कोरिया, बुरुंडी आणि इरिट्रियाने मात्र अजुन लसीकरण सुरु केलेलं नाही.

जगातील गरीब देशांसाठी कोव्हॅक्स योजना सुरु आहे. त्यातून गरीब देशांना लस पुरवण्यात येत आहे. विकसित देशांच्या तुलनेत या ठिकाणी खूपच कमी प्रमाणात लसीकरण सुरु आहे. जागतिक बँकेनं उच्च उत्पन्न असलेल्या देशांनी जिथे 100 लोकांमागे 111 डोस दिले आहेत तिथे कमी उत्पन्न असलेल्या देशांनी 100 लोकांमागे फक्त 2.4 इतकेच डोस दिले आहेत. गरीब देशांमध्ये विकसित आणि श्रीमंत देशांकडून लशी दान केल्यानंतर लसीकरण मोहिम सुरु होऊ शकली आहे.

कांगोसारख्या देशात 100 लोकांमागे फक्त 0.1 तर टांझानियात 0.4, नायजेरियात 1.9 आणि इथियोपियात 2.0 डोस झाले आहेत. जगात सर्वात कमी डोस या देशांमध्ये देण्यात आले आहेत. जगात 100 लोकांमागे 64 डोस देण्यात आले आहेत. मात्र हेच प्रमाण आफ्रिकी देशामंमध्ये 100 लोकांमागे 6.5 इतकं कमी आहे.