गाडी चालवणारे अनेकदा स्टंटबाजी करत असतात. यात ते जीवही धोक्यात घालतात. मग ते टु व्हीलर चालवणारे असोत किंवा फोर व्हीलर. आता सोशल मीडियावर एका चारचाकी गाडीचा व्हिडिओ व्हायरल होत आहे. सुरुवातीला जेव्हा व्हिडिओ पाहतो तेव्हा आपल्याला वाटतं की गाडी अडकून पडलीय. मात्र गाडी अडकलेली नाही तर तो ड्रायव्हर युटर्न घेत आहे. तेसुद्धा अशा ठिकाणी की जिथं थोडीशी जरी चूक झाली तरी गाडी दरीत कोसळेल. गाडीच्या लांबीपेक्षाही रस्त्याची रुंदी लहान आहे. तरीही चालक गाडी वळवतो.

अनेक सोशल मीडिया युजर्सनी हा व्हिडिओ शेअर केला आहे. मात्र व्हिडिओ नेमका कुठला आहे याबद्दल काही माहिती समोर आलेली नाही. व्हिडिओत दिसतं की, निळ्या रंगाची कार एका रस्त्यावर आडवी आहे. यात रस्त्याच्या एका बाजुला डोंगर तर दुसऱ्या बाजुला दरी आहे.

अगदी काठावर गाडी असूनही तो अशी गाडी वळवण्यात निष्णात असल्यासारखा गाडी सहज काढतो. थोडी मागे घेऊन वळवून पुन्हा पुढे घेत तो गाडी तिरकी करतो. काही इंच गाडी मागे घेत तो वळवतो आणि पुन्हा पुढे घेतो. असं करत करत पूर्ण गाडी वळवून रस्त्याने व्यवस्थित नेतो. आता या व्हायरल व्हिडिओवर ड्रायव्हरचं कौतुक केलं जात आहे. काहींनी हा व्हिडिओ एडिट असू शकतो असंही म्हटलं आहे.