भूगर्भामध्ये शीघ्र हालचाली  झाल्या की भूकवचाला खोल आणि विस्तीर्ण भेगा पडतात आणि या भेगांमधून तप्त ज्वालारस बाहेर पडतो. पृथ्वीच्या गर्भात असलेला तप्त शिलारस बाहेर पडला की तो संपूर्ण जमिनीवर पसरतो आणि थंड झाल्यावर तो खडकात रुपांतरीत होतो. हा ज्वालारस नेमका कसा दिसतो हे साऱ्यांनीच पाहिलं असेल. भगव्या, पिवळ्या आणि लालसर रंगाचा असलेला हा शिलारस प्रचंड तप्त असतो. त्यामुळे साधा फोटो किंवा व्हिडीओ जरी पाहिला तरीदेखील पाहताना अंगावर काटा येतो. यामध्येच सध्या सोशल मीडियावर आइसलँडमधील रेकजाविक येथील एका ज्वालामुखीचा व्हिडीओ तुफान व्हायरल झाला आहे.  या व्हिडीओमध्ये फाग्रादाल्सफजाल या ज्वालामुखीचा उद्रेक झाला असून त्यातून तप्त ज्वालारस बाहेर पडताना दिसत आहे. हा व्हिडीओ ड्रोनने शूट करण्यात आला आहे.

तुम्ही कधी ज्वालारसाची नदी पाहिली आहेत का? अर्थात याचं उत्तर नाही असंच असेल. परंतु. Bjorn Steinbekk या युट्यूबरने त्यांच्या कॅमेरात कैद केलेल्या एका व्हिडीओमध्ये चक्क ज्वालारसाची नदी वाहतांना दिसून येत आहे. रेकजाविक येथे  असलेल्या एका ज्वालामुखीचा उद्रेक झाला असून या ज्वालामुखीतून लाव्हारस उसळून वाहतांना दिसत आहे.

हेही वाचा :  मुंबईत आहेत १० प्रसिद्ध संग्रहालये; तुम्हाला माहित आहे का याविषयी?

दरम्यान, सध्या हा व्हिडीओ सोशल मीडियावर तुफान व्हायरल होत असून ६ हजारांपेक्षा जास्त जणांनी तो शेअर केला आहे. तर त्यावर असंख्य कमेंट्स आणि लाइक्सचा पाऊस पडत आहे.