न्यूयॉर्क : अमेरिकेतील न्यूयॉर्क शहरातील मॅनहॅटन इथं महात्मा गांधी यांच्या पुतळ्याची शनिवारी काही समाजकंटकांनी तोडफोड केली. या घटनेवर भारतीय कॉन्सुलेटनं जाहीर नाराजी व्यक्त केली आहे. तसेच स्थलांतरीत भारतीयांनीही या घटनेवर संताप व्यक्त केला आहे. (eitght foot high statue of Mahatma Gandhi vandalised in New York)

या घटनेवर प्रतिक्रिया देताना भारतीय वाणिज्य दूतावासानं म्हटलं की, ही घटना शनिवारी पहाटेच्या सुमारास घडली असून काही अज्ञात लोकांनी महात्मा गांधींच्या ब्रॉझच्या पुतळ्याची तोडफोड केली आहे. या घटनेची आम्ही तीव्र शब्दांत निंदा करतो. याप्रकरणाची तक्रार स्थानिक अधिकाऱ्यांकडे करण्यात आली आहे.

दूतावासाच्या माहितीनुसार, अमेरिकेच्या परराष्ट्र विभागासमोर या प्रकरणाच्या तात्काळ चौकशीची मागणी केली आहे. अधिकाऱ्यांनी या घृणास्पद कृत्यासाठी ज्या लोकांना जबाबदार धरलं आहे, त्यांच्यावर कडक कारवाई करण्यातचं आवाहन करण्यात आलं आहे. गांधी मेमोरियल इंटरनॅशनल फाउंडेशनने ही आठ फुटांची गांधीजींची प्रतिमा दान दिली आहे. गांधीजींच्या ११७ व्या जयंतीच्या मुहूर्तावर २ ऑक्टोबर १९८६ या पुतळ्याची स्थापना केली होती.

दरम्यान, या पुतळ्याला २००१ मध्ये हटवण्यात आलं होतं तसेच एका वर्षानंतर २००२ मध्ये त्याची पुनर्रस्थापना करण्यात आली होती. गेल्या वर्षी देखील काही अज्ञात व्यक्तींनी याच प्रकारे अमेरिकेच्या कॅलिफोर्निया राज्यातून गांधीजींच्या आणखी एक पुतळ्याची विटंबना केली होती.