नवी दिल्लीः एका निवृत्त लष्करी अधिकाऱ्याने यूट्युब व्हीडिओमध्ये देशातील काही अभिनेत्रींचा वापर सेनेकडून हनी ट्रॅपसाठी केला जात असल्याचा आरोप केला आहे. यानंतर खळबळ उडाली असून काही अभिनेत्री भडकल्या आहेत.

पाकिस्तानचे निवृत्त लष्करी अधिकारी आदिल रजा यांनी पाकिस्तानी अभिनेत्री सजल अली, कुब्रा खान आणि मेहविश हयात यांच्याकडे अंगुलीनिर्देश करीत पाकिस्तानी लष्कराकडून त्यांचा वापर होत असल्याचा दावा केला होता. सजल अली या पाकिस्तानी अभिनेत्रीने बॉलिवूडमध्येदेखील काम केलं आहे. श्रीदेवीच्या 'मॉम' सिनेमामध्ये सजल झळकली होती.

सजल अलीने पाकिस्तानी निवृत्त लष्करी अधिकारी आदिल रजा यांच्याविरोधात कारवाई करण्याची मागणी केली आहे. ती म्हणाली की, हे खूप वेदनादायी आहे.आपल्या देशातली परिस्थिती आणखी विदारक होत चालली आहे. कुणाच्या चारित्र्यावर प्रश्न उपस्थित करणं लाजीरवाणं आहे.

अभिनेत्री कुब्रा खान हिने इन्स्टाग्रामवर भलीमोठी पोस्ट लिहिली आहे. आदिल रजा यांनी तीन दिवसांच्या आत आपलं म्हणणं सिद्ध करण्याचं आवाहन तिने केलं आहे. शिवाय तिने रजावर कायदेशीर कारवाई करणार असल्याचं सांगितलं आहे.

कुब्रा पुढं म्हणाली की, मी सुरुवातीला शांत राहिले कारण एक खोटा व्हीडिओ माझ्या अस्तित्वाविषयी महत्त्वाचा ठरु शकत नाही. परंतु आता खूप झालं. कुणीही उठून आमच्याकडे बोट करेल, हे चालणार नाही. आदिल रजा यांनी एवढे आरोप लावण्यापूर्वी पुरावे देणं गरजेचं होतं. तीन दिवसांच्या आत पुरावे द्या, नसता आपल्यावर अब्रूनुकसानीचा दावा ठोकण्यात येईल. मी कुणाच्या बापाला घाबरत नाही, असा इशारा तिने दिला.

दरम्यान, निवृत्त लष्करी अधिकारी आदिल रजा यांनी व्हीडिओमध्ये पाकिस्तानी अभिनेत्रींबद्दल बोलतांना सांगितलं होतं की, राजकीय लोकांना फसवण्यासाठी काही अभिनेत्री जनरल बाजवा आणि माजी आयएसआय प्रमुख फैज हमीदसोबत मिळून काम करत आहेत. या व्हीडिओमध्ये आदिल रजा यांनी थेट अभिनेत्रींचं नाव घेतलं नसलं तरी त्यांच्या शॉर्ट फॉर्मचा उल्लेख केला. यानंतर नेटकऱ्यांनी अभिनेत्रींना ट्रोल करायला सुरुवात केली आहे.