पिण्यासाठी पाणी नाही, कि खायला अन्न नाही अशा परिस्थितीत अफगणिस्तानी नागरिक (afghanistan citizen) काबुल एअरपोर्टवर (kabul airport) सध्या दिवस काढत आहेत. हो हे खरं आहे... काबुल एअरपोर्टवर परिस्थिती इतकी वाईट आहे की, नागरिकांना एका पाणी बॉटलसाठी 40 डॉलर म्हणजे 3 हजार रूपये मोजावे लागत आहेत. तर एका राईस प्लेटसाठी 100 डॉलर म्हणजे 7 हजार 500 रूपये मोजण्याची वेळ आली आहे. अफगाणिस्तनात तालिबानी दहशतवाद्यांनी (Taliban Terrorist) केलेल्या कहरामुळे अनेक नागरिक देश सोडून जात असल्याची वेळ आली आहे. त्याचाच परिणाम म्हणून सध्या काबुल विमानतळावर नागरिकांचे आता खाण्यापिण्याचे हाल होत आहेत. अशातच एक गंभीर बाब म्हणजे काबूल विमानतळावर मिळणाऱ्या सुविधांही महागड्या आहेत. त्यामुळे नागरिकांवर चक्क उपासमारीची वेळ आली आहे. त्याहूनही गंभीर बाब म्हणजे अफगणिस्तानातील चलनातील नोटांचाही अस्वीकार केला जात आहे.

एअरपोर्टवर फक्त डॉलर्स स्विकारले जात असल्याने नागरिकांचे मात्र प्रचंड हाल होत आहेत. देश सोडून जाण्यासाठी एअरपोर्टवर नागरिकांकडून उपाशीपोटीच रांगेत उभे आहेत. एअरपोर्टवर पोहचूनही पाण्याच्या अनेक पटीने मोजावे लागणारे पैसे आणि जेवणासाठीचे पैसे यामुळे नागरिकही मेटाकुटीला आले आहेत. अशातच सर्वाधिक हाल होत आहेत, ते म्हणजे छोट्या मुलांचे...सध्या काबुल एअरपोर्टवर ५० हजारांहून अधिक लोक हे देश सोडण्याच्या तयारीत आहेत. त्यामुळे एअरपोर्टवर पोहचण्यासाठी अतिशय भयानक अशी वाहतूक कोंडी निर्माण झाली आहे. अनेकांना या वाहतूक कोंडीमुळेच एअरपोर्ट गाठणेही कठीण झाले आहे. त्यातच एअरपोर्टवर महागलेल्या गोष्टींमुळे नागरिकांच्या गैरसोईत आणखी भर पडत आहे.

अफगाणिस्तानातील नागरिकांनी रनवेवर मोठ्या प्रमाणात गर्दी केली आहे. काही जणांनाच एअरपोर्टवर जाण्याची परवानगी मिळाली आहे. पण अनेक लोक हे एअरपोर्टच्या बाहेरच प्रवेशासाठीची वाट पाहत आहेत. त्यामुळे एअरपोर्ट परिसरात लांबच लांब अशा रांगा लागल्या आहेत. आपल्याला रांगेत प्रवेशाची संधी कधी मिळेल या आशेवरच अनेक लोकांची गर्दी सध्या काबुल एअरपोर्टच्या बाहेरदेखील जमा झाली आहे. अनेकांचा नाईलाज असल्यानेच रांगेत प्रतिक्षेत थांबण्याशिवाय सध्या कोणताही पर्याय नागरिकांपुढे दिसत नसल्याचे चित्र सध्या दिसत आहे.