कोपेनहेगन : फिनलंडच्या पंतप्रधानांच्या अधिकृत निवासस्थानी आयोजित केलेल्या पार्टीमध्ये दोन महिला तोकडे कपडे घालून एकमेकींचे चुंबन घेत असल्याचे छायाचित्र प्रसिद्ध झाल्यानंतर आरोपांचा सामना करावा लागत असलेल्या पंतप्रधान साना मरीन यांनी जनतेची माफी मागितली आहे. तसेच आणखी एका पार्टीमध्ये मरीन यांनी अमलीपदार्थांचे सेवन केल्याचा आरोपही विरोधकांनी केला होता. मात्र, मरीन यांनी स्वत:हून चाचणी केल्यानंतर त्यांनी अमलीपदार्थांचे सेवन केले नसल्याचे सिद्ध झाले.

फिनलंडच्या पंतप्रधान साना मरिन यांच्या निवासस्थानी झालेल्या पार्टीमध्ये त्या मित्रमैत्रीणींबरोबर नाचत असल्याचा आणि गाणी म्हणत असल्याचा व्हिडिओ प्रसिद्ध झाल्यानंतर त्यांच्यावर टीका सुरु झाली आहे. तसेच, याच पार्टीमध्ये दोन महिला अत्यंत कमी तोकडे कपडे घालून चुंबन घेत असल्याचे छायाचित्रही प्रसिद्ध झाले होते. साना मरीन यांनी पत्रकारांसमोर येत, ते छायाचित्र त्यांच्याच निवासस्थानाच्या बाथरूममधील असल्याचे मान्य केले. तसेच, जुलैमध्ये झालेल्या या पार्टी प्रकरणाबद्दल त्यांनी माफीही मागितली. ‘ते छायाचित्र आक्षेपार्ह होते, मी त्याबद्दल माफी मागते. संगीत महोत्सवानंतर आयोजित केलेली ती एक खासगी पार्टी होती आणि त्यातील सहभागींची नावे सुरक्षा व्यवस्थेला आधीच कळविण्यात आली होती. मात्र, आम्ही केवळ सरकारी निवासस्थानाच्या खुल्या जागेचा वापर केला. मरीन यांनी आणखी एका पार्टीमध्ये सहभाग घेतला होता. त्यामध्ये मद्याचे सेवन केले होते, मात्र अमलीपदार्थांचे सेवन केले नव्हते, चाचणीद्वारेही ते सिद्ध झाले आहे, असे त्यांनी स्पष्ट केले.