कराची : पाकिस्तानातील कराची-रावळपिंडी तेजगाम एक्स्प्रेसला आज (ता. 31) पहाटे भीषण आग लागली. या आगीत आतापर्यंत 16 प्रवाशांचा मृत्यू झाला असून, 15 प्रवासी जखमी झाल्याची माहिती आहे. जखमींना उपचारासाठी तातडीने जवळच्या रूग्णालयात दाखल करण्यात आले आहे. जखमींपैकी काही जणांची प्रकृती गंभीर असून, मृतांची संख्या वाढण्याची शक्यता आहे.]

कराची-रावळपिंडी मार्गावर रहिम यार खान जवळ लियाकतपूर येथे ही भीषण आग लागली. आग लागल्याचे समजताच पोलिस व अग्निशमन दलांनी आग नियंत्रणात आणण्यास सुरवात केली आहे. इतर प्रवाशांना रेल्वेबाहेर काढण्यात येत आहे.  

कराची-रावळपिंडी एक्स्प्रेसला कशामुळे इतक्या मोठ्या प्रमाणात आग लागली, याचे कारण अद्याप कळू शकले नाही. आग लागल्यानंतर काही वेळातच बचावकार्य सुरू झाले, पण आगीने रौद्र रूप धारण केल्याने प्रवाशांना वाचविण्यातही बऱ्याचशा अडचणी येत आहेत. सुरवातीला मृतांचा आकडा 10 वर होता, मात्र या भीषण आगीत आता 16 प्रवासी मृत्यूमुखी झाल्याची माहिती आहे. जखमींना जवळच्या रूग्णालयात दाखल करण्यात आले असून, युद्धपातळीवर उपचार सूरू आहेत.