काबूल: तालिबानने काबुलमध्ये (Taliban kabul) प्रवेश करताच देश सोडून पळालेले अफगाणिस्तानचे माजी राष्ट्राध्यक्ष अश्रफ घनी (Ashraf Ghani) सध्या ओमान मध्ये असल्याची माहिती आहे. ते तजाकिस्तानमध्ये आश्रय घेणार असल्याचे वृत्त होते. पण तजाकिस्तानने त्यांच्या विमानाला लँडिंगची परवानगी नाकारली. अश्रफ घनी अमेरिकेला जाण्याची शक्यता आहे. माजी एनएसए मोहीब सुद्धा घनी यांच्यासोबत ओमानमध्ये आहेत. इंडिया टुडेने हे वृत्त दिलं आहे.

ओमानमधून ते अमेरिकेला जाण्याची शक्यता आहे. अफगाणिस्तान संकटात असताना, देश सोडून पळाल्यामुळे अश्रफ घनी यांच्यावर चहूबाजूंनी टीका होत आहे. त्यांनी आज सकाळी सोशल मीडियावरुन आपली बाजू मांडली. रक्तपात टाळण्यासाठी आपण अफगाणिस्तान सोडलं, असं त्यांनी सांगितलं.

अफगाणिस्तानमध्ये हिंसाचार, रक्तपात टळावा. सरकार आकाराला यावे, यासाठी अफगाणिस्तानचे माजी राष्ट्राध्यक्ष हमीद करझाई आणि अब्दुल्लाह अब्दुल्लाह तालिबानशी बोलणी करण्याचा प्रयत्न करत आहे. तालिबान त्यांना कसा प्रतिसाद देते, त्यावर सर्वकाही अवलंबून आहे.

मागच्या काही दिवसांपासून एक-एक प्रांत काबीज करणाऱ्या तालिबानने (Taliban) अखेर काबुल (Kabul) वर नियंत्रण मिळवलं आहे. ३४ पैकी २५ प्रांत तालिबानच्या ताब्यात आहेत. यामध्ये कंदहार, हेरात, मझार-ए-शरीफ आणि जलालाबाद अशी मोठी शहर आहेत.