काबूल: काबूल तालिबानच्या (kabul taliban) ताब्यात गेल्यानंतर परदेशी नागरिकांनी अफगाणिस्तान सोडण्यास सुरुवात केली आहे. विविध देशाच्या राजनैतिक अधिकाऱ्यांना (diplomatic personnel) अफगाणिस्तानातून (Afganistan) सुरक्षितरित्या (Evacuation) बाहेर काढण्याची प्रक्रिया सुरु असताना, काल काबूल विमानतळावर गोळीबाराची घटना घडली. स्पुटनिकने दिलेल्या वृत्तात या गोळीबारात किती जिवीतहानी झाली, त्याबद्दल कुठलीही स्पष्टता नाहीय.

अफगाणिस्तानचे राष्ट्राध्यक्ष अश्रफ घानी यांनी देश सोडल्यानंतर तालिबानी दहशतवादी काबुलमध्ये घुसले. त्यामुळे शहरात गोंधळाची स्थिती निर्माण झालीय. तालिबान राजवटीचा अनुभव असल्यामुळे नागरिकांच्या मनात भीती, दहशत आहे. अफगाणिस्तानात कशी गोंधळाची स्थिता आहे, त्याचे अनेक व्हिडीओ समोर आले आहेत. देश सोडण्यासाठी काबूल विमानतळावर गर्दी उसळली आहे. शेकडो लोक विमानतळावर दाखल होत आहेत.

काबूल विमानतळाच्या दिशेने जाणाऱ्या मुख्य रस्त्यावर वाहनांची गर्दी आहे. मूळ अफगाणि नागरिकांनीही देशाबाहेर जाण्यासाठी गर्दी केलीय. रस्त्यावर तालिबानी दहशतवाद्यांना पाहून नागरिकांच्या मनात भीती निर्माण झालीय, असे काबूल पीस फोरमच्या शरीफ साफी यांनी सांगितले. "आजचा दिवस वेगळा आहे. संपूर्ण शहर शांत आहे. प्रत्येकजण घाबरलेला आहे. आज दुपारी तालिबानने काबूलमध्ये प्रवेश केल्याचे आम्ही ऐकले" असे साफी यांनी अल जझीराशी बोलताना सांगितले.