तेल अविव- इस्राइल आणि हमासमध्ये सुरु असणाऱ्या युद्धाच्या पार्श्वभूमीवर आयडीएफकडून एक व्हिडिओ शेअर करण्यात आला आहे. या व्हिडिओचा आधार घेऊन इस्राइलच्या सुरक्षा दलाने दावा केलाय की, हमासचे अतिरेकी गाझातील सामान्य नागरिकांकडून अन्नधान्य आणि जीवनावश्यक वस्तू हिसकावून घेत आहेत. (Hamas members beat civilians and steal the humanitarian aid they received from international organizations facilitated by Israel)

गाझातील नागरिकांसाठी आंतरराष्ट्रीय मदत देण्यात येत आहे. पण, ही मदत हमासचे अतिरेकी बळजबरीने लुटत आहेत, असं इस्राइलच्या लष्कराने म्हटलंय. व्हिडिओमध्ये दिसत आहे की, बंदूकधारी अतिरेकी लोकांना मारत आहेत. त्यांना धमकावून त्यांच्याकडील अन्नधान्य आणि जीवनावश्यक वस्तू हिसकावत आहेत.

इस्राइलने ७ नोव्हेंबरपासून हमास विरोधात युद्ध पुकारले आहे. हमासच्या अतिरेक्यांनी केलेल्या हल्ल्याला प्रत्युत्तर म्हणून त्यांनी हे पाऊल उचललं. युद्धामध्ये आतापर्यंत १६ हजारांपेक्षा अधिक जणांचा मृत्यू झालाय. सर्वाधिक मृत्यू गाझा पट्टीतील निष्पाप नागरिकांना झाला आहे. यात मोठ्या प्रमाणात महिला आणि लहान मुलांचा समावेश आहे.

गाझा पट्टीतील भीषण परिस्थिती पाहता आंतरराष्ट्रीय पातळीवरुन त्यांच्याकडे मदतीचा ओघ सुरु झाला आहे. सुरवातीच्या काळात इस्राइलने ही मदत मिळू नये असे प्रयत्न केले होते. पण, जागतिक देशांच्या दबावामुळे त्यांनी मदतीसाठी परवानगी दिली. आता इस्राइलने आरोप केलाय की मिळालेली आंतरराष्ट्रीय मदत हमासच्या अतिरेक्यांच्या हातात जात आहे.

इस्राइलच्या सुरक्षा दलाने दावा केलाय की, हमासचे दहशतवादी छुप्या पद्धतीने हल्ला करत आहेत. ते सर्वसामान्य लोकांना ढाल करत आहेत. तसेच शाळा, मश्चिद यामध्ये लपून हल्ला करत आहेत. दरम्यान, हमासने दावा केलाय की, इस्राइल सुरक्षा दल सर्वसामान्य नागरिकांना लक्ष्य करत आहे. तसेच सर्वसामान्य नागरिकांना मदत मिळण्यात अडथळा निर्माण करत असल्याचा आरोप केलाय.(Latest Marathi News)