Israel Hamas War: इस्राईलने आज दक्षिण गाझामध्ये जोरदार केलेल्या हवाई हल्ल्यांमध्ये किमान २८ पॅलेस्टिनी नागरिकांचा मृत्यू झाला. तसेच, आधीच उद्ध्वस्त झालेल्या उत्तर गाझामध्येही कारवाई सुरूच ठेवताना सैनिकांनी कामकाज सुरू असलेल्या अखेरच्या रुग्णालयावरही छापे घालत जोरदार हल्ले केले.

इस्राईलच्या लढाऊ विमानांनी आज दक्षिण गाझामध्ये अनेक ठिकाणी हल्ले केले. उत्तर गाझामधील हल्ल्यांनंतर लाखो पॅलेस्टिनी नागरिक दक्षिण गाझामध्ये स्थलांतरित झाले असताना याच भागात हल्ले वाढविण्यात आले आहेत. राफा शहरातील एका इमारतीवर बाँब पडून २५ जणांचा मृत्यू झाला. या इमारतीत राहणारे सर्वजण स्थलांतरित होते.

दुसऱ्या एका बाँबस्फोटात आणखी तीन जणांचा मृत्यू झाला. वास्तविक दक्षिण गाझामध्येही राफाही सर्वांत दक्षिणेला आहे. सामान्य नागरिकांना हल्ल्यांची झळ पोहोचू नये म्हणून सर्वांनी याच शहराच्या परिसरात जावे, असे इस्राईलनेच आवाहन केले होते. तरीही येथे थेट हल्ले होत असल्याने चिंता वाढली आहे.

गाझा पट्टीतील हानी

मृत्यू : २०,०००

विस्थापित : १९ लाख (८० टक्के)

उत्तर गाझा पूर्णपणे उद्ध्वस्त

दक्षिण गाझामधील अनेक शहरांमध्ये हानी

वीज, पाणी, अन्न, औषध यांचा तुटवडा

रुग्णालयाच्या भिंती पाडल्या

उत्तर गाझामधील अनेक रुग्णालयांवर हल्ले करून त्यांना ‘जर्जर’ करणाऱ्या इस्राईलने गाझात कार्यरत असलेल्या अखेरच्या रुग्णालयावरही छापे घातले. सैनिकांनी रुग्णालयाच्या कुंपणभिंती बाँबने पाडून प्रवेशद्वारही तोडले. इस्राईलच्या सैनिकांनी रुग्णालयातील बहुतेक कर्मचाऱ्यांना ताब्यात घेतले आहे.

आता या रुग्णालयात शंभरहून अधिक जखमी रुग्ण असून त्यांच्यावर उपचार करण्यासाठी दोन डॉक्टर, चार परिचारिका आणि दोन वॉर्ड बॉय इतकेच जण शिल्लक आहेत. या रुग्णालयाभोवती रणगाडे उभे करण्यात आले. सामान्य नागरिकांच्या आडून हमासचे दहशतवादी हल्ले करत असल्यानेच ही कारवाई करावी लागत असल्याचा इस्राईलचा दावा आहे.