खलिस्तानी दहशतवादी हरदीप सिंग निज्जर याच्या हत्येनंतर भारत आणि कॅनडा या दोन देशांमध्ये तणावाचे वातावरण आहे. यादरम्यान याप्रकरणी एक धक्कादायक बाब समोर आली आहे अमेरिकेतील न्यूज पोर्टल 'द इंटरसेप्ट'ने दिलेल्या रिपोर्टमध्ये अमेरिकन एजन्सी एफबीआयकडून युएसमध्ये राहणाऱ्या खलिस्तान समर्थकांना सावध करण्यात आलं होतं असा दावा करण्यात आला आहे.

या रिपोर्टमध्ये खलिस्तान समर्थकांशी संपर्क साधून एफबीआयने त्यांच्या जीवाला देखील धोका असू शकतो असं सांगत सावध केलं होतं. मात्र त्यांना धोका कशापासून असू शकतो याबद्दल कुठलीही माहिती देण्यात आली नव्हती. या वर्षी १८ जून रोजी खलिस्तानी दहशतवादी निज्जर याची अज्ञातांनी गोळ्या झाडून गत्या केली होती. ज्यामध्ये भारताचा सहभाग असल्याचा आरोप कॅनडाचे पंतप्रधान भारतावर करत आहेत. यानंतर दोन्ही देशांमध्य तणावाचे वातावरण आहे. निज्जर खलिस्तान टायगर फोर्सचा दहशतवादी होता, ज्याच्यावर भारताकडून बंदी घालण्यात आली होती.

अमेरिकन शीख कॉकस कमेटीचे संचालक प्रीतपाल सिंग यांनी द इटरसेप्टशी बोलताना सांगितले की, कॅलिफोर्नियामध्ये अनेक लोकांकडे एफबीआयकडून फोन करण्यात आले आणि निज्जरची हत्या झाल्याचे सांगण्यात आले. तसेच दोन स्पेशल एजेंट्स मला भेटायला देखील आले होते. ते म्हणाले की, माझ्या जीवाला धोका असल्याची माहिती मिळाली आहे. मला सावध राहण्याची गरज आहे, मात्र त्यांनी कोणापासून सावध रहावे याबद्दल सांगितले नाही. नाव न सांगण्याचा अटीवर दोन इतर शीख समुदायातील नागरिकांनी देखील सांगितले की एफबीआय एजंट्स त्यांच्याकडे आले होते. मात्र एफबीआयने इंटरसेप्टला याबद्दल कुठलीही माहिती दिली नाही.

यादरम्यान अमेरिकेचे परराष्ट्र मंत्री अँटनी ब्लिंकन यांनी शुक्रवारी ते निज्जर हत्या प्रकरणात कॅनडाला मदत करत आहोत अशी माहिती दिली.

तसेच कॅनडामध्ये तैनात अमेरिकेचे राजदूत डेव्हिड कोहेन यांनी दावा केला आहे खी फाइव्ह आइज अलायन्सने दिलेल्या माहितीच्या आधारेच कॅनडाने भारतावर हरदीप सिंग निज्जरच्या हत्येत सहभागी असल्याचा आरोप केला आहे. मात्र कॅनडाने आतापर्यंत याबद्दल कुठलाही पुरावा दिला नाहीये, तसेच भारताने कॅनडाच्या राजदूतास देशातून काढून टाकले आहे सोबतच कॅनडाची व्हिजा सेवा देखील निलंबित केली आहे.