नवी दिल्ली : अफगाणिस्तानात तालिबानचा विजय झाल्यानंतर भारताची आज तालिबानी नेत्यांसोबत अधिकृत चर्चा झाली. कतारची राजधानी दोहा येथे भारताचे राजदूत दीपक मित्तल आणि तालिबानी नेता शेर मोहम्मद अब्बास स्टानेकजई यांनी भेट झाली. या बैठकीसाठी तालिबानकडूनच निमंत्रण देण्यात आलं होतं.

अफगाणिस्तानातील स्थितीबाबत भारत आणि कतार सातत्यानं संपर्कात आहेत. अफगाणिस्तानमधील परिस्थितीवर तोडगा निघावा यासाठी कतारचे एक विशेष राजदूत मुतलक बिन माजीद अल कहतानी याच महिन्याच्या सुरुवातीला नवी दिल्लीत आले होते. यावेळी त्यांनी भारताला अफगाणिस्तानातील परिस्थितीवर चर्चा करण्यासाठी कतारला बोलावलं होतं.

तालिबानचं एकमेव राजकीय कार्यालय २०१३ पासून कतारमध्ये आहे. कतारची राजदानी दोहा इथेच तालिबान, अफगाण सरकार आणि अमेरिकेमध्ये अफगाणिस्तानातील सत्ता कराराबाबत चर्चा झाली होती.