नवी दिल्ली : पॅलेस्टाइनमधील भारतीय दुतावासातील अधिकारी मुकुल आर्य यांचं निधन झालं. सध्या युक्रेनमध्ये अडकलेल्या भारतीयांना मायदेशात आणण्यासाठी मोहीम सुरू असताना ही घटना घडली आहे. त्यानंतर संपूर्ण देशभरातून शोक व्यक्त केला जात आहे. भारताचे परराष्ट्रमंत्री एस. जयशंकर यांनी ट्वीट करत शोक व्यक्त केला आहे. (Indian ambassador mukul arya passed away in palestine)

पॅलेस्टाइनमधील रामल्ला येथे रविवारी ते दुतावासात होते. त्यानंतर भारतीय दूतावासात ते मृतावस्थेत आढळले होते. त्यांच्या मृत्यूसंदर्भातील अधिक माहिती अजून समोर आली नाही. त्यांच्यामृत्यूनंतर परराष्ट्रमंत्री एस. जयशंकर यांनी शोक व्यक्त केला आहे. त्याचबरोबर पॅलेस्टाइनचे परराष्ट्रमंत्री डॉ. रियाद अल मलिकी यांनीही मुकुल आर्य यांच्या कुटुंबियांप्रती सहनुभुती व्यक्त केली आहे.

दरम्यान मुकुल आर्य यांनी दिल्लीतील परराष्ट्र मंत्रालयाच्या मुख्यालयातही कामं केलं होतं. ते २००८ सालच्या बॅचचे अधिकारी होते. त्यांनी काबूल आणि मॉस्कोमध्येही भारतीय दूतावासात काम केलं होतं. त्यांनी भारतीय परराष्ट्र सेवेत भरती होण्याअगोदर दिल्ली विश्वविद्यापीठ आणि जवाहरलाल विद्यापीठात अर्थशास्त्राचा अभ्यास केला होता.

त्यांच्या मृत्यूची बातमी कळल्यानंतर एस. जयशंकर यांनी भावनिक ट्वीट करत म्हटलंय की, "रामल्लामध्ये भारतीय दुतावासातील अधिकारी मुकुल आर्य यांच्या निधनाच्या बातमीने धक्का बसला आहे. ते एक हुशार आणि बुद्धिमान अधिकारी होते. ओम शांती." असं लिहित त्यांनी आपल्या भावना व्यक्त केल्या आहेत.