नवी दिल्लीः अमेरिकेकडून शस्त्रास्त्रांची मदत मिळाल्याने गाझामधील हमासविरोधातील युद्ध ‘आणखी अनेक महिने’ चालेल, असा इशारा आज इस्राईलचे पंतप्रधान बेंजामिन नेतान्याहू यांनी दिला. त्यामुळे स्थलांतर कराव्या लागलेल्या पॅलेस्टिनी लोकांचे हाल आणि आंतरराष्ट्रीय समुदायाचा विरोध हे सर्व झुगारून नव्या वर्षातही गाझा पट्टीत युद्धाचे वातावरण कायम राहील, हे स्पष्ट झाले आहे.

अमेरिका सरकारने संसदेतील प्रक्रिया टाळून इस्राईलला शस्त्रास्त्रांची मदत जाहीर केली आहे. तसेच, अमेरिकेने संयुक्त राष्ट्रातही इस्राईलविरोधी ठराव हाणून पाडला होता. त्यामुळेच इतर अनेक देशांचा शस्त्रसंधीसाठी दबाव वाढत असतानाही गाझापट्टीत हल्ले सुरूच ठेवण्यावर इस्राईल ठाम आहे.

रविवारीही इस्राईलच्या लढाऊ विमानांनी खान युनिस शहराच्या नजीक असलेल्या नुसेरत आणि बुरैज या गावांमधील मदत छावण्यांवर हल्ले केले. सात ऑक्टोबरला हमासने केलेल्या हल्ल्यानंतर इस्राईलने सुरू केलेल्या प्रतिहल्ल्यांमध्ये आतापर्यंत २१,६०० हून अधिक पॅलेस्टिनी नागरिकांचा मृत्यू झाला आहे. सकाळपर्यंतच्या २४ तासांमध्ये १६५ जण मृत्युमुखी पडले आहेत.

पत्रकारांशी बोलताना नेतान्याहू यांनी युद्ध दीर्घकाळ चालेल, असा इशारा दिला. ‘‘आमचे धोरण स्पष्ट आहे. हमासला नेस्तनाबूत करेपर्यंत आम्ही कारवाई सुरूच ठेवणार आहोत. हमासच्या ताब्यातील आमच्या लोकांची सुटका करणे, हेही आमचे उद्दिष्ट आहे. अमेरिकेने केलेल्या मदतीमुळे आम्हाला हे शक्य होणार आहे,’’ असे नेतान्याहू यांनी सांगितले. हमासच्या ताब्यात अद्यापही १२० जण आहेत.