7 ऑक्टोबर रोजी हमास या दहशतवादी संघटनेने इस्राइलवर मोठा हल्ला केला होता. याला प्रत्युत्तर देत इस्राइलने काही तासांमध्येच युद्धाची घोषणा केली होती. सुरुवातीला गाझा पट्ट्यामध्ये हवाई हल्ले केल्यानंतर इस्राइलने आपले सैनिक देखील याठिकाणी पाठवण्यास सुरुवात केली होती. आता आपलं सैन्य मुख्य गाझा शहरात पोहोचलं असल्याचं इस्राइलने सांगितलं आहे.

इस्राइलचे संरक्षण मंत्री योआव गॅलंट यांनी याबात माहिती दिली. "आम्ही गाझा शहराच्या मध्यात आहोत. गाझा हा जगातील सर्वात मोठा दहशतवादी तळ आहे. आम्ही हमासला पूर्णपणे नष्ट करुनच परतणार आहोत", असं ते म्हणाले.

लेबननला दिला इशारा

यावेळी इस्राइलचे पंतप्रधान बेंजामिन नेतन्याहू यांनी लेबननला देखील इशारा दिला. "हिजबुल्लाह संघटनेने या युद्धामध्ये उडी घेण्याचा प्रयत्न करू नये. ती त्यांच्या आयुष्यातील शेवटची चूक असेल", अशा शब्दांमध्ये नेतन्याहू यांनी हिजबुल्लाह संघटनेला इशारा दिला आहे. हिजबुल्लाह ही हमास प्रमाणेच एक संघटना आहे. या संघटनेला इराणचा पाठिंबा मिळालेला आहे. (Global News)

नेतन्याहू पुढे म्हणाले, की जोपर्यंत इस्राइलच्या 240 ओलीस ठेवलेल्या नागरिकांना सोडलं जात नाही, तोपर्यंत शस्त्रसंधीचा विचारही केला जाणार नाही. तसंच, गाझा पट्ट्यात इंधन देखील जाऊ दिलं जाणार नाही.