मिलान : कोरोना विषाणूने जगभरात सर्वांत जास्त थैमान घातलेल्या इटलीमध्ये एका दिवसांत 651 जणांचा मृत्यू झाला असून, मृतांची संख्या 5476 एवढी झाली आहे.
कोरोना विषाणू संसर्गाची सर्वाधिक झळ बसलेल्या इटलीमध्ये गेल्या 24 तासांमध्ये तब्बल 651 जणांचा मृत्यू झाला आहे. मृतांच्या संख्येत इटलीतील संख्या सर्वांत जास्त आहे. आतापर्यंत इटलीमध्ये कोरोनामुळे 5476 जणांचा मृत्यू झाल्याचे सरकारी अधिकाऱ्यांनी सांगितले.
कोरोनाच्या संसर्गामुळे इटलीतील जनजीवन पूर्णपणे ठप्प झाले असून अनेक भागांमध्ये भीतीपोटी मृतांवर अंत्यसंस्कार करण्यासाठीही लोक पुढे येत नाहीत. देशातील नागरिकांभोवतीचा या विषाणूंचा फास आणखी आवळल्या गेला असून रस्ते, चौक, रेस्टॉरंट ओस पडले आहेत. रोमपासून नेपल्सपर्यंत आणि व्हेनिसपासून फ्लोरेन्सपर्यंत सर्व लोकांनी आता स्वत:ला घरामध्ये कोंडून घेतले आहे. इटलीतील ज्या कोडोग्नो शहरातून या विषाणूचा संसर्ग सुरू झाला तेथील परिस्थिती सध्या नियंत्रणात असल्याची माहिती सूत्रांनी दिली. इटलीमध्ये सध्या पूर्णपणे टाळेबंदी जाहीर करण्यात आली असून आवश्यक कामांसाठी घराबाहेर पडण्याच्या सूचना नागरिकांना करण्यात आल्या आहेत.
इटलीमध्ये आतापर्यंत 59 हजार 138 जणांना या रोगाची लागण झाल्याचे समोर आले आहे. एका दिवसांत या आकड्यामध्ये सहा हजारांनी वाढ झाली आहे. आतापर्यंत 7024 नागरिक या आजारातून सावरले आहेत. उत्तर इटलीतील लोंबार्दी प्रांताला या विषाणूमुळे सर्वांधिक फटका बसला आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.