Japan Earthquake : जपानच्या शिकोकू येथे बुधवारी रात्री भूकंपाचे तीव्र हादरे बसले. शिकोकू बेटाच्या पश्चिम किनाऱ्यावर ६.४ तीव्रतेचा भूकंप जाणवला. या दुर्घटनेत कोणतीही जीवितहानी झाल्याचे वृत्त नाही. त्याशिवाय त्सुनामीचाही धोका नसल्याचं 'द जपान टाईम्स'ने वृत्तामध्ये म्हटलं आहे.

जपानमधील कोची आणि एहिम प्रीफेक्चर्सच्या काही भागांमध्ये भूकंपाचे हादरे जाणवले. ही घटना बुधवारी रात्री घडली आहे. ६.४ रिश्टर स्केल हा सर्वाधिक तीव्रतेचा भूकंप होता.

या भूकंपाचा केंद्रबिंदू बंगो चॅनेलमध्ये असल्याचं सांगितलं जात आहे. क्युशू आमि शिकोकू बेटांना वेगळं करणारा हा परिसर आहे. यासह जपानच्या पश्चिम भागामध्ये भूकंपाचे हादरे बसले.

महत्त्वाची बाब म्हणजे एहिम प्रीफेक्चरमध्ये असलेल्या शिकोकू इलेक्ट्रिक पॉवरच्या इकाटा न्यूक्लिअर प्लांटला या हादऱ्यामुळे धोका पोहोचलेला नाही. 'एनएचके'ने यासंबंधिचा अहवाल दिला आहे.