गेल्या कित्येक काळापासून आपण अनेक गोष्टींमध्ये पाश्चात्य संस्कृतीचं अनुकरण केलं आहे. मात्र, आता याच विदेशी नागरिकांना भारतीय संस्कृतीची भूरळ पडू लागली आहे. त्यामुळेच अनेक विदेशी नागरिक भारतीय संगीत, नृत्य यांच्यात स्वारस्य दाखवू लागले आहेत. विशेष म्हणजे आता या नागरिकांचा कल हळूहळू हिंदी व संस्कृत भाषेकडेही वळू लागला आहे. गेल्या काही काळापासून अनेक विदेशी सेलिब्रिटी त्यांच्या अंगावर संस्कृत शब्दांचे टॅटू गोंदवून घेत असल्याचं समोर आलं आहे. (know-real-meaning-of-anuugacchatu-pravaha-tattoo-of-katy-perry)

सध्या विदेशात संस्कृत श्लोक किंवा शब्द गोंदवून घेण्याचा नवा ट्रेंड सुरु झाला आहे. यामध्येच अनेक जणांनी 'अनुगच्छतु प्रवाह' या शब्दाचा टॅटू गोंदवून घेतल्याचं पाहायला मिळत आहे. विशेष म्हणजे प्रसिद्ध अमेरिकन सिंगर आणि संगीतकार केटी पेरीनेही तिच्या हातावर 'अनुगच्छतु प्रवाह' हा टॅटू गोंदवून घेतला आहे. तेव्हापासून सोशल मीडियावर या टॅटूची चर्चा सुरु झाली आहे. इतकंच नाही तर अनेकांनी या शब्दाचा अर्थदेखील सर्च करत आहे.

'अनुगच्छतु प्रवाह' शब्दाचा नेमका अर्थ काय?

'अनुगच्छतु प्रवाह' या शब्दाचा मूळ अर्थ आहे प्रवाहासोबत जाणे. थोडक्यात सांगायचं झालं तर, आयुष्यात येणाऱ्या प्रत्येक संकटाचा सामना करत पुढे चालत रहा. जे समोर येईल, आयुष्य जी दिशा दाखवेल तसं चालत रहा.

दरम्यान, विदेशी नागरिकांमधील या संस्कृत शब्दाची क्रेझ पाहून आता भारतीयांनीदेखील 'अनुगच्छतु प्रवाह' या शब्द गोंदवून घेण्यास सुरुवात केली आहे. विशेष म्हणजे या शब्दाचे टी शर्टदेखील बाजारात उपलब्ध झाले आहेत. लोकप्रिय गायिका केटी पेरी, प्रसिद्ध कॉमेडियन, अभिनेता रसॅल ब्रँड यांनीही त्यांच्या अंगावर 'अनुगच्छतु प्रवाह' गोंदवून घेतलं आहे.