ब्रिटनच्या परराष्ट्र सचिव लिझ ट्रस या ब्रिटनच्या नव्या पंतप्रधान बनल्या आहेत, पदच्युत बोरिस जॉन्सन यांच्यानंतर त्यांनी प्रतिस्पर्धी भारतीय वंशाचे ऋषी सुनकचा यांचा पराभव केला आहे.

लिझ ट्रस यांनी ब्रिटनच्या पंतप्रधानपदासाठीच्या शर्यतीत भारतीय वंशाचे नेते ऋषी सुनक यांचा पराभव केला. दरम्यान लिझ ट्रस मंगळवारी पंतप्रधानपदाची शपथ घेणार आहेत. लिझ ट्रस यांना 81,326 आणि ऋषी सुनक यांना 60,399 मते मिळाली. थेरेसा मे आणि मार्गारेट थॅचर यांच्यानंतर लिझ ट्रस ब्रिटनच्या तिसऱ्या महिला पंतप्रधान बनल्या आहेत. पंतप्रधान निवडणुकीच्या शेवटच्या टप्प्यातील मतदान शुक्रवारी संपले. निवडणूक निकालापूर्वी आलेल्या मतदानपूर्व सर्वेक्षणात ऋषी सुनक हे लिझ ट्रस यांच्या मागे असल्याचे सांगण्यात आले होते.

ब्रिटनचे माजी पंतप्रधान बोरिस जॉन्सन यांनी त्यांच्या सरकारमधील अनेक घोटाळे आणि मंत्र्यांच्या राजीनाम्यानंतर पंतप्रधानपद सोडण्याची घोषणा केली आणि नवीन पंतप्रधान पदासाठी जुलैमध्ये निवडणूक सुरू झाली. बोरिस जॉन्सन यांनी पंतप्रधानपदाचा राजीनामा दिल्यानंतर जवळपास दोन महिन्यांपासून सुरू असलेली चढाओढ आज अखेर संपली असून ब्रिटनला नवा पंतप्रधान मिळाला.