अमेरिकेच्या मेन (Maine) स्टेटच्या लेविस्टन शहरात बुधवारी रात्री बेछूट गोळीबारात २२ लोकांचा मृत्यू झाला होता, तर ५० हून अधिक लोक जखमी झाले होते. तेव्हापासून संशयित आरोपी हल्लेखोराचा शोध घेतला जात होता. मात्र आता या हल्लेखोराचा मृतदेह सापडला आहे.

मीडिया रिपोर्ट्सनुसार, घटनेनंतर संशयित हल्लेखोर फरार झाला होता आणि त्याचा शोध घेतला जात होता. दोन दिवसांनंतर सुरक्षा अधिकाऱ्यांना आरोपी मृत आढळला आहे. याबाबत फारशी माहिती मिळू शकली नाही, मात्र अधिकाऱ्यांनी पत्रकार परिषद बोलावली आहे.

यापूर्वी, सुरक्षा अधिकार्‍यांनी फेसबुकवर संशयित हल्लेखोराचे रायफलसह दोन फोटो शेअर केले होते आणि संशयिताची ओळख पटविण्यासाठी नागरिकांना मदतीचे आवाहन केले होते.

मीडिया रिपोर्ट्सनुसार, ४० वर्षीय रॉबर्ट कार्डचा मृतदेह लुईस्टनपासून आठ मैल दूर जंगलात सापडला आहे. हा मृतदेह एका रीसायकलींग सेंटरजवळ सापडला . सूत्रांच्या हवाल्याने असे सांगण्यात आले आहे की, ही घटना घडल्यानंतर आरोपीने स्वत:वर गोळी झाडून घेतल्याचा पोलिसांना संशय आहे.

घटनेच्या दोन दिवसांनंतर शुक्रवारी अधिकाऱ्यांनी गोळीबाराच्या घटनेत ठार झालेल्यांची ओळख पटवली, ज्यात एक ७० वर्षीय जोडप्यापासून ते एका १४ वर्षांच्या मुलाचा देखील समावेश आहे. गोळीबाराच्या घटनेने दक्षिण मेनमधील या शहरात भीतीचे वातावरण निर्माण झाले आहे.