शिकागो : कंपनीतील महिला सहकाऱ्याशी संबंध ठेवल्याप्रकरणी मॅक्‍डोनाल्ड्‌सने मुख्य कार्यकारी अधिकारी स्टीव्ह ईस्टरब्रुक यांना राजीनामा द्यावा लागला आहे. स्टीव्ह 2015 पासून मॅकडोनाल्ड्‌सचे मुख्य कार्यकारी अधिकारी म्हणून कार्यरत होते. कंपनीच्या मेन्यू आणि रेस्टॉरंट्‌स मॉडेलमध्ये आमूलाग्र बदल करण्याचे श्रेय स्टीव्ह यांना जाते. त्यांच्या काळात मॅकडोनाल्ड्‌सचा शेअर दुपटीने वाढला आहे. 

कंपनीतील वरिष्ठ अधिकाऱ्यांनी आपल्या सहकाऱ्यांशी सहमतीने देखील संबंध ठेऊ नयेत, असा कंपनीचा नियम आहे. मात्र स्टीव्ह गेल्या काही दिवसांपासून आपल्या कंपनीतील महिला कर्मचाऱ्यांशी संबंध ठेवून होते होते. त्यांनी एका ई-मेलच्या माध्यमातून कंपनीतील कर्मचाऱ्यासोबत असलेल्या संबंधाची माहिती दिली. कंपनीच्या धोरणांचा विचार करता, मी कंपनीच्या मंडळाशी सहमत आहे. ""आता इथून बाहेर पडण्याची वेळ आली आहे"", असे म्हणत त्यांनी आपला राजीनामा दिला.

स्टीव्ह यांनी आपल्या कारकिर्दीची सुरुवात मॅक्‍डोनाल्ड्‌समधून 1993 साली व्यवस्थापक म्हणून केली होती. त्यानंतर, पिझ्झा एक्‍सप्रेस आणि वागामामा या आशियाई फूड कंपनीमध्ये त्यांनी विविध जबाबदाऱ्या पार पाडल्या. 2013 मध्ये पुन्हा मॅक्‍डोनाल्ड्‌समध्ये परतल्यानंतर 2015 साली त्यांची मुख्य कार्यकारी पदावर नेमणूक करण्यात आली होती. "ईस्टरब्रुक" यांच्यानंतर क्रिस केंपिजिन्स्की यांना मॅकडोनाल्ड्‌स यूएसएचे सीईओ म्हणून जबाबदारी देण्यात आली आहे. 

web title : McDonalds Chief Executive Officer Resigned