नेपिटो - म्यानमारमध्ये सध्या लष्कराने सर्व सूत्रे हाती घेतली आहेत. लष्कराविरोधात नागरिक रस्त्यावर उतरल्यानंतर त्यांच्यावर गोळीबारही केला जात आहे. यामध्ये आतापर्यंत 400 हून अधिक नागरिकांचा मृत्यू झाला आहे. थायलंड सीमेवर असलेल्या गावात लष्कराने हवाई हल्लाही केला. यानंतर नागरिक थायलंडमध्ये पळून जाण्याचा प्रयत्न करत आहेत. दुसरीकडे म्यानमारला लागून असलेल्यी चीनच्या सीमेवरील गावात सहा कोरोनाचे रुग्ण सापडले आहेत. यामुळे जवळपास दोन महिन्यांनी रुग्ण सापडल्यानं चीनने लॉकडाऊनची घोषणा केली आहे. 

रुईली इथं लक्षणं नसलेले तीन रुग्ण सापडले. त्यांचे वय 24 ते 28 वर्षांच्या दरम्यान आहे. रुईली हे म्यूसमधील क्रॉसिंग पाँइंट आहे. याठिकाणी म्यानमारमधील संघर्षाच्या पार्श्वभूमीवर स्थलांतर करणाऱ्यांचे प्रमाण वाढले आहे. यामुळे सीमेवर सैनिकांचा बंदोबस्त वाढवण्यात आला आहे.

हे वाचा - कोरोनाच्या नव्या स्ट्रेनसमोर वर्षभरातच लस निष्प्रभ ठरेल; सर्वेमधून धक्कादायक माहिती

कोरोनाच्या भीतीने चीनने म्यानमार सीमेवर असलेल्या गावात लॉकडाऊन केलं आहे. इथं कडक निर्बंध लागू करण्यात आले असून त्याबाबतचे आदेश दिले आहेत. रुईलीमध्ये राहणाऱ्या सर्व रहिवाशांची कोरोना चाचणी करण्यात येईल. तसंच प्रत्येकाला आठवडाभर होम क्वारंटाइन व्हावं लागेल असे अधिकृत पत्रकच काढण्यात आलं आहे. रहिवाशांना अत्यावश्यक सेवा वगळता इतर कोणत्याही कारणास्तव बाहेर जाता येणार नाही. अत्यावश्यक साहित्य खरेदीसाठीसुद्धा प्रत्येक घरातील फक्त एकच व्यक्ती बाहेर जाऊ शकते. 

हे वाचा - इम्रान खान यांनी दिले मोदींच्या पत्राला उत्तर; काय ते वाचा

म्यानमारमधील लष्कराने केलेल्या गोळीबारानंतर नागरिक इतर देशांमध्ये जाण्याचा प्रयत्न करत आहेत. यामध्ये भारताचाही समावेश आहे. यामुळे मणिपूरने अशा स्थालंतर करणाऱ्या नागरिकांना अन्न निवारा देऊ नये असा आदेश काढला होता. चंडेल, तेंगोउपल, कामजोंग, उखरूल आणि चुराचंदपूरच्या उपायुक्तां असे आदेश 26 मार्चला दिले होते. मात्र हा आदेश आता मागे घेण्यात आला आहे.